596/2026-2027

Kolasib, 19th May, 2026 : Vawiin chawhma dar khan Mizoram Legislative Assembly Deputy Speaker leh Kolasib bialtu MLA ni bawk, Pu Lalfamkima chuan MZP Sub-Headquarters, Bairabi ten YMA Hall, Bairabi North-a Mizo Zirlai Titha Chawimawina an buatsaih a hmanpui a.

Hemi hnu hian Pangbalkawnah zirlai titha chawimawina hun a hmanpui leh nghal a ni.

He hunah hian Deputy Speaker Pu Lalfamkima chuan thu sawiin, zirlaiten an hmabak an thlirnaah mahni inhriatchian a ngaih thu a sawi a. Thiante tih ang ti ve ringawt lovin, mahni tuina leh thahnemngaihna zawng thlan thiam a pawimawh a, pawisa tam lam aiin mahni tuina zawnah chuan hlawhtlinna pawh a hnai zawk thin a ni, a ti. Thian kawm fimkhur a tul thu chahin, degree ringawt aiin thiamna tak tak (quality education) neih a pawimawh zia a tarlang a. Tunlai changkanna leh AI (Artificial Intelligence) khawvelin min tuam mek laia heng zirna leh hriatna tizautu tur hmanruate hi tangkai taka hmang tur leh, a tha zawnga hmang hram hram turin zirlaite a chah a ni.

He hunah hian MZP Sub-Headquarters, Bairabi Secretary hnen atangin report ngaihthlak a ni a. Bairabi-ah hian kum 1998 khan BSU Branch anga awm tanin, kum 2000 atang khan MZP Sub-Headquarters an lo nih tak thu tarlan a ni. Zirlaite leh khawtlang tana an hmalakna hrang hrangte tarlangin, sikulah te kangmei ven chungchang awareness an pek thin thu leh, ramri humhalh (Inner line reserve) kawngah endikna tha zawk neih a nih theih nan DC leh MZP General Headquarters-a thlen ngaite an thlen thin thu a sawi a. Hnam dang hnathawk leh sumdawngte permit endik hna an thawh thin bakah, sikul hrang hranga mamawh bungrua (thuthleng, dawhkan, lectern leh silpauline) te an sem thin thu tarlan a ni. Zirlai harsatna tawk leh chhiat tawkte tanpuina vehbur khawnin an hlan thin a, board exam hmachhawntute tlawhkualin an mamawh te an lo ngaihvensak thin a ni. Harsatna neite tan MZP chu belh theihin an awm reng thu leh, admission leh form buaipui ngaihah te zirtirtute nena tangtlangin zirlaite puih hna an thawk thin a ni.

Hemi hnu hian Deputy Speaker Pu Lalfamkima chuan Pangbalkawnah zirlai titha chawimawina a hmanpui leh a. Zirlai hlawhtlinna changte lawmpuina hlanin, an hma hunah theihtawp chhuah chhunzawm zel turin a fuih . Tun hmaa zirna kal dan leh tun hun inang lo chho ta zel chu tarlangin, class 10 (matric) pass pawhin hlutna nei hle thin mah se tunah chuan a aia sâng zir zel a ngai tawh a. Hlawhtlinna lo chan chhoh zelah pawh indah sang mai lova, hawihhawm taka hmalam pan zel turin zirlaite a chah a ni.

Mihringte hian kan hma hun kan hriat lawk loh avangin kan awh ngawih ngawih te pawhin nakinah chuan min la awt ve thei a ni tih hria a, belhchian dawl leh thiamna tak tak (quality education) nei turin tan lak a ngai a ni, a ti a. Hna sang leh hniam bik a awm loh thu leh, eng hna pawh thawk ila taima leh awhawm taka thawh theih a pawimawh thu a sawi. Social media leh thiamna lo thang chho zelah zirna puitu tur hmanrua (AI kaihhnawih) te kan bul hnaiah awlsam taka hmuh theih a nih tawh avangin hengte hi tangkai taka hmang thiam turin a chah a. Mizoram Youth Commission (MYC) kaltlangin ram pawn thlenga hna thawk turin kawng a awm tawh zia sawiin, rilru fim tak pu a hmabak thlir turin duhsakna a hlan a ni.