1744/2026-2027

Kolasib, 12th August, 2026: Vawiin chawhma khan Parish Hall, Venglai, Kolasib-ah Office of the Treasury Officer, Kolasib District buatsaihin 'District-Level Sensitization Programme on Voluntary Surrender of Pension Payment Orders (PPOs)' neih a ni. He hun hi Kolasib Bawrhsap Pu H. Dolianbuaia chuan Khuallian niin a hmanpui a, Pi Lalremruati, Treasury Officer chuan a kaihruai a ni.

Khuallian Pu H. Dolianbuaia chuan thu sawiin, Treasury office lamin hetiang inzirtirna hun tha tak an buatsaih chu lawmawm a tih thu a sawi a. Dan dik tawk lova family pension la mekte tan in-surrender-na hun hawn mek a nih thu sawiin, "September thla hun hawn chhung ngei hian insiamthatna hun hi hman tangkai tur a ni a, he hun tiam chhunga tifel lo te chu dan in a ruahman angin pawisa rulh te a ngai dawn a, chuvang chuan a in surrender tur te chuan he hun hi bawhpelh loh a tha a ni," a ti.

Bawrhsap chuan mipui zingah pension dik lo taka la thin, la thei lo tih inhre renga hre lo der tlat te, ti lui leh thuneituten an hriatchhuah loh vanga la lui te an awm thin chu pawi a tih thu a sawi a. Rinawmna chu kan hringnun leh kan tawngtaina nena inzawm tlat a nih thu sawiin, hnathawhnaah leh engkimah rinawmna kan neih a pawimawh hle a ni, a ti bawk. He pension lak dan dik lo thleng thin hi a theih anga tihtawp a nih theih nan VC, YMA leh MJA te pawhin mipuite zinga nasa taka sawi darh leh inzirtirna kalpui turin a chah a ni.

He hunah hian Pi Lalmangaihi, Accounts Officer hnen atangin report ngaihthlak a ni a. Chawhnu lam Technical Session hi Pu J. Laldawngliana, Accounts Officer-in a kaihruai a, Resource Person Pu R. Lallawta, A&AO, DLFA&P hnen atangin presentation leh zirtirna pawimawh tak tak ngaihthlak a ni.

Vawiin a sensitisation program ah hian CCS (Pension) Rules, 1972 hnuaia Family Pension lak theih dan leh la thei lote dinhmun chipchiar taka zirtir a ni a. Fanu pasal nei tawh, pasal nei reng chunga la te leh minimum monthly family pension, Dearness Relief nena chhut kawpa Rs 12,702/- aia tam thla khata sum lakluh nei te chuan family pension an la thei tawh lo tih hriattir a ni. Sum lakluh tih hian sawrkar atanga hlawh lak chauh ni lovin, in leh garage luah man te, sumdawnna leh private emaw kohhran school atanga hlawh lak te pawh a huam vek a ni. Hemi bakah hian family pensioner a boral chuan a rang lama Pension bu nena Treasury Office-a in-report nghal thin a pawimawh zia mipuite hriat turin an tarlang bawk a ni.