District Aids Prevention & Control Committee, Kolasib District buatsaihin World Aids Day, 2016 pualin vawiin khan Parish Hall, Kolasib-ah hun hman a ni.

World Aids Day puala hun hman hi Dr. Rk Lalthlamuana, SMO/DACO in a kaihruai a,  HIV/AIDS chungchanga inzirtirna hrang hrang neih niin film tawi "Ka Nu Lehkha" tih en ho a ni bawk.

He huna thusawi  Dr. Lalhlimpuia, CMO in kalkhawmte chu HIV leh AIDS laka him nan insumtheihna a pawimawh ber thu sawiin, 'Aih' tih ngam a pawimawh zia a sawi a. Mipat Hmeichhiatna ah insum tluk a awm loh rualin insum thei nganglo te pawh condom hmang ngei turin a chah a ni. Dr. Lalhlimpuia chuan Kolasib District-ah HIV/AIDS vei hriatchhuah thar leh hmuhchhuah thar an awm zel chu pawi a tih thu a sawi a. Kolasib district a he natna inkaichhawnna bulpui ber pakhat chu damdawi a inchiu ten hriau thianghlimlo inhman tawm vang a nih thu sawiin, ruihhlo do kawngah tan lak a ngai a ni a ti. Thalai kalkhawmte nun uluk taka hmang tur a chahin, enkawlna tha dawn vat theih nan inringhlel chuan thisen test tir vat tur a ni a ti bawk.

January-September, 2016 thlenga Kolasib district-a thisen test zat hi 5017 niin heng zinga 1950 chu naupai an ni a. Thisen test atang hian mi 180 in HIV+ an ni tih hmuhchhuah a ni a, chung zinga 12 chu naupai an ni.