2809/2023-2024

2023 Sahmulphah thla ni 20: Vawiin khan Directorate of Ayush, Health & Family Welfare Department, Government of Mizoram hma laknain TS Luaia Middle School, Rengtekawn, Kolasib-ah 8th World Ayurveda Day pualin hun hman a ni.

World Ayurveda Day vawi 8-na puala hun hmannaah hian District Hospital Kolasib aṭangin Senior Medical Officer (Ayush) Dr C. Vanlalhlimpuia hovin doctor leh thawktu dangte thawk chhuakin, TS Luaia Middle School-ah Ayurvidya (School Health and Education Programme) buatsaih a ni a. SMO Dr C. Vanlalhlimpuia chuan Ayurveda chungchang leh hriselna kawnga hriat tur pawimawh hrang hrangte sawiin, zirlai kal khawmte chu rilru leh taksa hrisel nei tura an nunphung leh ei leh in uluk turin a chah a. District Hospital Kolasib-a Physical & Stress Management Instructor Pu R. Lalhmangaihzuala chuan zirlaite chu taksa sawizawi pawimawhna leh taksa sawizawi dan tur (basic yoga exercise) a zirtir bawk.

He hunah hian a thlawna inentirna (free clinic) buatsaih nghal a ni a. Mi 98 hriselna dinhmun enfiah niin, a thlawnin damdawi eng emaw zat sem a ni bawk.

World Ayurveda Day hi kum 2016 aṭang khan hman ṭan niin, kum tin thupui neiin October thla chawhnu lam emaw, November thla chawhma lamah emaw hman a ni ṭhin a. Kumin thupui atan hian, "Ayurveda for One Health - Ayurveda for everyone on every day" tih chu hman a ni.