2808/2023-2024

2023 Sahmulphah thla ni 20: Vawiin khan Kolasib District chhunga hriselna dinhmun enfiahna leh inentirna (clinical establishment)-te dan anga chhinchhiah leh khuahkhirh tura din, District Registering Authority (DRA) chu an Chairman, Kolasib District Bawrhsap Pu John LT Sanga hovin Kolasib DC Conference Hall-ah a ṭum khat nan an ṭhu khawm.

Chairman Pu John LT Sanga chuan District Registering Authority tih tur leh thuneihna tlangpui tar langin, ṭhut khawm buatsaih chhan a sawifiah a. Mihring taksa hriselna dinhmun enfiahna (laboratory) chu natna chungchanga inenkawl zui zel dan tur hriltu a nih avangin a pawimawh hle a, mihring himna leh hriselna khawih a nih angin clinic leh laboratory-te chu fimkhur taka kalpui a ṭul a ni, a ti a. Clinic leh laboratory-te khuahkhirh leh vil zui tura din DRA chuan thuneihna leh mawhphurhna sang tak a nei tiin, member-te chu tihtak zeta an mawhphurhna hlen chhuak turin a chah a. Thih leh dam inkar hriltu a nih theih avangin, mihring himna dah pawimawh hmasa ber chunga danin a phut anga clinic leh laboratory te kalpui zel turin Kolasib District chhunga clinic leh laboratory enkawltute chu a chah nghal bawk.

He hunah hian DRA Convener, Kolasib District Senior Chief Medical Officer Dr RK Lalthlamuana chuan Clinical Establishment Act, 2010 hnuaia clinical establishment-te zawm tur tlangpui sawifiahin, clinic leh laboratory te chu DRA-ah an inziah luh (register) vek a, a him chin leh pawm theih chin (minimum standard) an phak ngei ngei a ṭul thu a sawi a. Kolasib District chhunga laboratory-te tan kar hmasa lam khan minimum standard training buatsaih a nih thu sawiin, he hunah hian laboratory-te'n chhinchhiahna an tar tur te, himna tura zawm tur te, faina leh thianghlimna kawnga zawm tur te, khawl enkawl dan tur te, thawktute thiamna ngai chin leh thil pawimawh hrang hrang inzirtir a ni, a ti.

Kolasib CMO Office-in an chhinchhiah danin, tun dinhmunah Kolasib District chhungah sawrkar hriatpui clinical establishment 33 a awm mek a. Hemi zinga 7 chu government establishment (District Hospital, Community Health Centre leh Primary Health Centre) niin, a dang 26 chu mimal din (private) laboratory leh clinic a ni thung.

Sawrkar laipui dan siam, The Clinical Establishments (Registration and Regulation) Act, 2010 behchhanin Mizorama clinical establishment-te chhinchhiah, khuahkhirh leh vil zuina tur, The Mizoram Clinical Establishments (Registration and Regulation) Rules, 2014 chu Mizoramah hman a ni a. Mizoram Sawrkara Health & Family Welfare Department Commissioner & Secretary aṭanga lehkha dawn bawhzui leh Mizoram CE (R&R) Rules, 2014 Section 4(1) tlawh chhanin Kolasib District Bawrhsap & Chairman Pu John LT Sanga chuan Kolasib District Registering Authority chu November ni 16, 2023 khan din tharin, vawiin khan ṭhut khawm hmasa ber koh a ni ta a ni.

Vawiin ṭhut khawmah hian Kolasib District chhunga DRA hnuaia hma lakna tur hrang hrang sawi ho a ni a. Clinic leh laboratory provisional registration nei tawh sate chu DRA hnuaia registration puitling nei thei tura danin a phut ang hlen chhuah nan kum 2 chhung hun pek an ni dawn a. Provisional registration la nei lote chu thla 6 chhung hun pek an ni dawn thung a ni. Kolasib DRA chuan sawrkar hriatpui loh leh dan anga taksa dinhmun endik leh damdawi chawh phalna nei lote lakah fimkhur a, chuti ang chu pan lo turin Kolasib District mipuite an chah a ni.