2807/2023-2024

Marpara 'S'; the 19th of November, 2023: Nimin  chawhnu dar 1:00 khan Pi Ramdinliani, Deputy Commissioner, Lunglei District chuan Marpara ‘S’ a Zonal YCA Hall-ah North Eastern Council (NEC) project hnuaia Electrical Wiring leh Puanthui Training kharna hun chu khuallian niin a hmanpui.

Training kharna hunah hian khuallian Pi Ramdinliani chuan thu sawiin, Ministry of DoNER hnuaia North Eastern Council chuan Lunglei District chhunga Bunghmun RD Block hmun hrang hrangah hmasawnna hna a thawk a, chung zingah chuan Marpara ‘S’ khua develop nan a hran liau liauin project siam a ni, a ti. Indoor stadium, High School building, Training/Capacity building centre, Bazar shed, dumping ground te sak a nih dawn bakah sub-centre thuam that a nih tur thu sawiin, hmasawnna hna thawh hrang hrang te chu dik leh tling, chhenfakawm tak a nih theih nan an theihna zawn theuhah tan la turin kalkhawmte chu sawmin, a tul chuan contractor hna thawk tha lo te chu thuneitute hnena complaint hreh lo turin a chah hlawm bawk. Training chhuakte chu a lawmpui thu sawiin, an thil zir te eizawn na’n  an hman mai piahlamah hmun hrang hranga thawn chhuak thei tura hlawhtling ngei turin duhsakna a hlan bawk a ni.

Khuallian chuan sawi chhunzawmin, thlai thar chhuah leh hralh chungchangah te, thil siam chhuah chungchang leh hmasawnna ruhrel din kawngah te Sawrkar tihsak hun ringawt nghak mai lova, Sawrkar nawr kal thei khawp a hma la thin zawk turin kalkhawmte a chah bawk a ni.

Pu Donny Lalruatsanga, Addl. Deputy Commissioner, Lunglei District kaihhruai training kharna programme-ah hian Pu H. Lalramenga, BDO, Bunghmun RD Block chuan Technical Report a pe a. Training te hi  NEC project “Proposal of identified village for providing key identified services at Marpara ‘S’ village of West Bunghmun RD block, Lunglei District” hnuaiah buatsaih a ni a. August ni 11, 2023-ah training diltute atanga beneficiary thlanna interview buatsaih a ni a. Training te hi ni 17.10.2023-ah tan niin, ni 18 awh electrical wiring training-ah mi 20 an tel a, ni 30 awh puanthui zirna training-ah hian mi 15 an tel a ni. Electrical wiring hi Pu C. Ramluahpuia, Instructor, Vocational Training Centre, Lunglei in a zirtir a. Tailoring hi Pi R. Laltlannungi, in a zirtir thung. Training a telte hian an training chhung DA an dawn bakah, training zawhah hian crrtificate leh eizawnna atana hman chhunzawm tur bungrua tangkai tak tak an dawng bawk a ni. Training pahnih te hi NEC fund hmanga BDO, Bunghmun R.D. Block in a buatsaih (implement) a ni.

Training kharna hunah hian Pu Shanti Moni, VCP, Marpara ‘S’ chuan lawmna thu (Welcome speech) a sawi a. Young Chakma Association (YCA) leh Mahila Samiti, Marpara ‘S’ branch ten hnam lam entirin, Pu H. Rosangpuia, Technical Assistant, BDO Bunghmun office in programme kharna hun a siam bawk. Trainees te bakah Marpara ‘S’ Village Council member te, Zonal YCA leh Marpara ‘S’ chhunga YCA branch pahnih hruaitu te, Mahila Samiti hruaitute leh mipui thahnem tak training kharna hunah hian an tel a ni.

Pu Donny Lalruatsanga, Addl. DC bakah Pi Lalvenhimi Ralte, BDO, Lunglei R.D. Block leh Pi Malsawmhriatzuali, Sub-Deputy Commissioner ten Lunglei atangin DC hi an tawiawm a ni.