Vawiin khan Kolasib St. Maria Goretti’s School Hall-ah World No Tobacco Day hman a ni a, Dy. Commissioner Pi Niharika Rai, IAS chuan he hun hi a hmanpui a ni.

Thuchah sawiin Pi Niharika Rai chuan Tobacco tih chin hi Habit thalo tak mai a ni a. Chu habit chu sima kalsan tur chuan thinlung chhungril atanga tumna kan neih a ngai a, mihringte hi chhia leh tha hriatna fim tak nei, thilsiam chungnung tak kan ni, a ti a. Vawiin niah hian Tobacco la ti lo ten a hlauhawmzia hre thar ila, tih ching laklawhte pawhin kan taksa a chhiat hmain tih tlem/ zuk tlem i tum ang u, a ti a ni.

Pi Rai chuan, India ram hi khawvel ramteah Tobacco hman uarna ram a ni a, Mizoram hi India ramah Tobacco avanga Cancer vei tamna ber kan la ni lehnghal a. Hei hi thil sawi zahthlak tak ni mahse, in enlet nan i hmang hlauh ang u, a ti a. Skul naupangte chu a thatlohzia pu darhtu ni ula, in chhungte leh in thenawm khawvengah Zuk leh hmuam pawizia, thihna leh natna thlentu a nihzia hi lo sawi darh ula. Sim theilo in chhungte an awm chuan ti tlem turin ngen ang che u, tiin a chah a ni.

Dr.Sangthuama Ngente, CMO & Member Secretary, District Anti Tobacco Squad, Kolasib chuan World No Tobacco Day hmanna inkhawm hi a kaihruai a. Zuk leh hmuam do kawnga tan lak a tulzia leh natna hlauhawm a thlenzia a sawi a ni.

Pu Lalrinzuala, BEE, CMO Office chuan Day pual theme chungchang a sawifiah a. WHO chhut danin kum tinin mi maktaduai 6 vel Tobacco vangin an thi a. Chuta nuai 6 vel chu Mei zumi nilo, midang meikhu hip, second hand Smoker an ni, tih a sawi a. Tobacco thatlohzia hi sawi chamchi mah ila a siamtu leh zuartu lam company ten a kalh zawnga tan anlo lak ve reng avangin hma lakna a chak tawk thei lova. Tihrem vek theih nilo mahse a la ti velote hnena a pawizia thu hi sawi uar a tul hle a ni, tiin a sawi a ni.

St. Maria School naupangten second hand smoke pawizia, Blue Ribbon Campaign neiin Anti Tobacco lam mawi tak he hunah hian an entir bawk a ni.