Vawiin chawhma dar 11.00 khan World Population Day 2014 chu DC leh Chairman, District Health Society ni bawk Pu Jitender Yadav IAS hovin CMO Conference hall-ah urhsun taka hman a ni a; inkhawm hi Dr. R.K. Lalthlamuana, Senior Medical Officer-in a kaihruai a ni.
Khuallian Pu Jitender Yadav chuan, “Vawiin, khawvel pum huapa ni pawimawh tak mai Kolasib-ah kan hmang ve hi lawmawm ka ti a. Tin, he khawvela mihring kan pung chak lutuk hian kan dam khawchhuahna min nghawng miau avangin urhsun taka hman pawh a tul a. Kan hmuh leh hriat phak maiah pawh, mihring pung chho zel avangin Kolasib district-ah ngei pawh tunhma aiin nitin khawsakna min nghawng nasa tawh hle a ni” a ti.
Kumina khawvel puma World Population Day-a thupui chu ‘Invest in Young People’ tih a ni a, a Mizotawng chuan, “Thalaite hi Chawm Puitling Ang U” tihna a nih angin, sawrkar lama policy duangtu te, Kohhran leh NGO hrang hrangte pawhin thalaite hmakhua kan hriatreng a tul a ni a ti. India rama World Population Day thuchang thlan, ‘Planned Family, Endless Happiness(Fel Taka Ngaihtuah Chunga Chhungkaw Din Hi, Hlimna Chuai Thei Lo A Ni” tih chungchangah, khuallian chuan, “Nu leh pa te hian family planning hi kan thiam a tul em em a. Kan enkawl theih tawk tur – zirna tha te, eizawnna kawng ngaihtuahpui te, an hriselna tura chaw tha kan pek theih tawk tur fa neih dan thiam a pawimawh tihna a ni” a ti.
Kolasib-a he ni hmannaah hian Dr. C. Ngurbiakveli, District Medical Superintendent chuan family planning chungchang leh a kaihhnawih te, a pawimawhna te, a sawifiah a. ‘Nupa karah mipa aiin hmeichhiaten family planning-ah mawh an phur sang zawk a. Kum 2050 atang chuan India ram pawhin fa pakhat chauh neih hi kalpui a tum a, mahse, intihluihna a tel lo vang’ a ti. Kolasib District chhungah tunah hian mihring 85969 an awm mek a, chhiarpui hmasa aia mihring punna chu za zela 25.94 a ni a, hei hi pem lut tam vang aimahin, naupiang za zela 86 laia pun vang a nih thu a sawi.Kolasib khawpui bikah hian mihring 33404 an cheng a ni.
He inkhawmah hian Kolasib chhunga office hrang hranga thawkte leh mi sawmbik te an tel tha hle a; R. Vanlalruata, Asst. Director-in lawmthu sawiin a tawp a khar a ni.
