Vawiin chawhma dar 11.00 khan, MZP Headquarters, Kolasib huaihawtin St. John’s Higher Secondary School, Kolasib-ah he khawpui chhunga kumina HSLC leh HSSLC Exam-a titha te chawimawina inkhawm buatsaih a ni a. He hun hi Health & Family Welfare Minister Pu Lal Thanzara chuan a hmanpui a ni. Pu Lal Thanzara chuan zirlaite hnenah thuchah sawiin, “Lehkha kan zir hian tum mumal tak kan neih a tul a; College luh tum ringawta lehkha kan zir hi sim ila, vocational training uar a, thiam thil zir uar kan mamawh a ni” a ti. A tha zawnga ram tidanglam theitu chu Education a nih thu sawiin, “hetih mek lai hian, thiamna tak tak thleng si lova zir ve ringawt hian unemployment a tisang thin a ni” Minister chuan a ti bawk.

Pu Lal Thanzara chuan ram hmasawnna turin mipui hriselna ngaih pawimawh a ngai a, amaherawhchu, keini Mizo hnam tlem te hi zuk leh hmuam leh ruihhlo lamah kan tlan nasa a; hei hi hnualsuat nachang kan hriat loh chuan a pawi hle dawn a ni, a ti. Doctor indaih lohna tikiang tura theih tawpa tan lak mek a nih thu a sawi lang bawk. Mizoram-ah Medical College siam tura theihtawp chhuah mek a nih dan Health Minister chuan a sawi a; kum 2015 August thlaa lut hman turin MBBS zirlai 100 lak tumin kan inbuatsaih mek a ni,a ti.

MZP General Headquarters President Pu Lalhmachhuana pawhin thu sawiin, zirlaite chu hmathlir thui tak neia zir tur leh, eng hunah pawh mahni ram leh a chhunga bungrua engpawh neitu nihna thinlung pu tlat turin a chah a ni.

Vawiina Kolasib Headquarters MZP ten zirlai titha, lawmpuina an hlan te hi Distinction leh 1st Division a pass te an ni a. Class X ah zirlai 27 leh Class XII ah zirlai 32 te an ni a. Chawimawina inkhawm hi P.C. Zosangliana, President, MZP Headquarters, Kolasib chuan a kaihruai a ni.

Attachment

  • Loading attachment...