Loneituten man tlawm zawk leh hlawk zawka buh an lo thar chhuah theihna tur a nih beiseiin vawiin khan Agriculture Department chuan District hrang hranga loneitute hman tur tractor leh rotavator a pe chhuak a. Heng khawltharte hi tukin khan Agriculture Minister Pu R.Lalzirliana chuan Agriculture Office kawt atangin a vai liam a ni.

Pu R Lalzirliana chuan loneitute hman tur khawl thar pekchhuah a ni leh ta hian sorkarin kuthnathawktute a ngaih pawimawhzia leh an tana theihtawp a chhuahzia a tilang a, kuthnathawktuten an mawhphurhna hlen ve thung a thahnemngai taka hna thawk turin a chah. Sorkar hian kuthnathawktute hman tur Power Tiller, Mini Power Tiller leh Tractor engemawzat a lo pe chhuak tawh a. Khawl thar pek chhuah te chu uluk taka enkawl tur leh tu leh fate thlenga thatpui theih tur khawp a tangkai leh taimak chhuahpui turin a ngen bawk a ni.

RKVY Stream I hnuaiah Sub Mission on Agricultural Mechanisation (SWAM) kaltlangin Establishment of Farm Machinery Banks for Custom Hiring hnuaiah heng khawlte hi pekchhuah a ni a. Loneitu intelkhawm (society) te hnenah sorkarin man tlawm te in Tractor leh a hmanraw dangte pe in anmahnia inrelbawl tura ruahman a ni. Loneitu intelkhawmte chuan Society Registration Act hnuaiah an in ziaklut ang a,, member ten thawhhona rilru puin leilehna khawl leh hmanraw dangte chu an enkawlho dawn a ni. Khawl leina senso hi RKVY Stream-I in za a 75 a tum anga, NLUP lam atangin za a 15, loneitute intelkhawmten a bak za a 10 hi an tum ve thung ang. A thawhkhatna atan District 4 ah hmalak phawt a ni a. Aizawl District chhungah Kaihzawl (Saitual/Keifang); Lunglei District ah Ngengrual (Thingfal); Champhai District ah Phaizau (Champhai) leh Tuisen (Khawzawl); Serchhip District ah Zawlpui -I leh Zawlpui-II, Phaidung (N.Vanlaiphai)-ah te hmalak a ni.

Tarlan tak zau khat zelah hian Tractor (42 HP with Trailer) leh Rotavator pek an ni a. Buh seng hunah buh sengna khawl Self Propelled Paddy Reaper pek leh theuh an ni ang. Society ah khawlte chu pekchhuah niin anmahni awmna DAO theuhte kaihhruaina hnuaiah inrelbawl dan tur an duang ho dawn a ni.

Loneitute tana khawl thar pekchhuah inkhawm hi Agriculture Secretary Pu Lalram Thanga’n a kaihruai a, Agriculture Crop Husbandary Director Dr C.Lalzarliana’n he scheme kalphung tlangpui a tarlang a ni. Inkhawmah hian Parliamentary Secretary Lt.Col.Z.S.Zuala (Retd.)pawh a tel.