Vawiin khan Pu H. Rohluna, Minister School Education chuan INTACH Mizoram Chapter buatsaih Essay and Painting Competition lawmman semna Secretariat Conference Hall-a neih chu a hmanpui.
Pu H. Rohluna chuan INTACH hian Pipu te rohlu ngaihhlutna an tuh thin hi a lawmawm a, kan pi leh pute nun dan thangthar ten an lo hriat a an vawnhim zel theih nan tan la zel turin pawl member te chu a chah. Minister chuan INTACH hian Mizoram mipui ah harh tharna an pe hi a ropui a tih thu sawiin, thil hlui (heritage) humhalh nachang kan hriat a, kan hnam rohlu thahnem tak thangthar te tan kan hnutchhiah hi a pawimawh a ni a ti. INTACH in competition hrang hrang naupang tan an buatsaih thin hian naupang rilru ah thil hlui ngaihhlutna nasa takin a tuh thin a ni tiin hei hian naupang thiamna leh theihna a sawr chhuak nasa hle bawk a ni Minister chuan a ti.
Lawmman semna inkhawm hi Pu P. Rohmingthanga, IAS (Retd.) Convener,INTACH Mizoram Chapter in a kaihruai a, Pu Rin Sanga, IAS (Retd) Co-Convener, INTACH Mizoram Chapter chuan report tawi a pe.
Lawmman dawngtute chu Essay Regional Winner Zomuansangi, Class IX, St. Pauls’ High School, Painting Regional Winner pahnih an awm a chungte chu Rinsangzeli, Class VIII Gospel Centenary School leh Ryan Lalremsiama, Class VI Gospel Centenary School. Essay and Painting Competition hi INTACH leh School Education Department tangkawp buatsaih niin sikul naupang Class VI - Class IX tan a buatsaih a nia, sikul 7 atangin an tel a ni.
INTACH (Indian National Trust for Arts and Cultural Heritage) hi India ram pum huap a themthiamna (art) leh hnam ro humhalh leh chawisangtu pawl hi 1984 atang khan din a ni a, Mizoram Chapter pawh hi hemi kum vek hian din a ni. He pawl din chhan leh an tum chu India ram a hnam tin ten kan pipute atanga rochun thil hnam ro bo pil mai tur humhalh leh chung thil te chu venhim a tulzia inzirtirna neih thin hi a ni. Kum 2010 atang khan zirlaite zingah helam hawi zawng a competition te hi All India level huapin a siam thin a, kumin hian Essay and Painting Competion on ‘My Living Icon’ neih a ni.
