Nimin khan Serchhip District Legal Services Authority buatsaihin Lal Thanhawla Higher Secondary School-ah World Day Against Child Labour pualin hun hman a ni a, Pi Lalsiampuii, District Child Protection Officer chuan Resource Person niin a hmanpui a ni.

He hunah hian Pi Lalsiampuii chuan India ram chu khawvela naupang hna rim thawka la chhawr rual loh chhawr tamna ber ram a nih thu a sawi a, Mizoramah erawh chuan vanneih thlak takin hetianga inchhawr luihna hi sawi tham a la awm lutuk loh thu a sawi tel bawk.

Pi Siampuii chuan zirlai naupangte chu Dan hmanga sawrkarin hmeichhia leh naupangte a humhalh dan leh vohbikna chi hrang hrang a siamsakte hrilhin, hetih rual hian an dikna chanvo chauh ngaihtuah lova he dikna chanvo in mawhphurhna a kentel te pawh hre tel tur leh ngai pawimawh turin a chah hlawm a ni.

He hunah hian Serchhip District Child Protection Officer chuan Child Protection Society nihphung leh hnathawhte pawh tarlang telin Juvenile Justice Act-in naupang a tih, kum 18 la pel lo ten kawng hrang hranga harsatna an tawhte laka tanpuina, enkawlna leh chhawmdawlna an pek thin dan te a sawi a. Naupang dan bawhchhiate enkawlna leh enkawl dan te, reitheihna leh chhan dang vanga zirna chhunzawm thei lo te puih dan kawng te, naupang hna thawka chhawrluih laka himna te leh mipat hmeichhiatna lam hawia inkhuaikhemna leh chumi avanga hremna awm thei te, chutiang tuartute enkawlna leh chhawmdawl dan te a sawi bawk a ni.

Pi Siampuii chuan tunlaia tleirawl ten an buaipui nasat em em; damdawi hmansualna avanga rilru lama harsatna te, ngaihzawng chungchang avanga rilru hrehawmna leh chhan dang dang vanga nun khawharna leh beidawnna neite tan, engtik lai pawha biakrawn theih an nih thu leh mahni inlan kher lo pawhin Child Line no. 1098-ah engtik hun lai pawhin man chawi lova biak theih reng an nih thu a sawi bawk a ni.

He hunah hian Legal Service Volunteer Pu Albert Lalthansanga pawhin thu sawiin dan hriat vek chu a zir ngeite tan pawh thil theih loh a nih rualin, kan nitin khawsakna atana pawimawh zual te hi chu hriat ve a pawimawh thu a sawi a, a bik takin mipat hmeichhiatna lam hawi; dan siam tharte a khirha a khauh thu sawiin mipate fimkhur leh invawn a tul thu uar takin a sawi a, dan lama harsatna nei tan engtik lai pawhin Legal Aid Clinic, DC Office leh Serchhip Police Station bakah North Vanlaiphai leh East Lungdarah te biakrawn tur an awm thu a sawi bawk a ni.

Attachment

  • Loading attachment...