1757/2023-2024

2023 Mimkut thla ni 5: Tukin khan Kolasib-ah 'Zirtirtu Ni' (Teacher's Day 2023) pualin zirtirtute chawimawina hun leh kawng zawh buatsaih a ni.

Kolasib Venglai Bazar-a Zirtirtu Ni puala inkhawm buatsaih chu Kolasib District Education Officer Pi K. Lalsiamliani'n a kaihruai a. Kal khawmte lawmna thu a sawi bakah, Zirtirtu Ni hman chhan a sawi fiah bawk.

Kolasib All NGO Co-ordination Committee Chairman Pu Thomas D. Lalengliana chuan zirtirtute pawimawhna sawiin, zirtirtute chu mipui vantlang innghahna bulpui (backbone of society) an ni a, an ropuiin an mawhphurhna pawh a sang hle a ni, a ti a. Zirtirtute chu hna zahawm thawktu an nih thu sawiin, ṭha tak leh taima taka an rawngbawlna, zirtirtu hna chu chhunzawm zel turin duhsakna a hlan a. Zirlaite fuihna thu sawiin, naupangte thiam theihna thuruk chu nu leh pa leh zirtirtute thu awih a ni, a ti a. An tih turte taima taka an thawh chuan hlawhtlinna chu khel lovin a lo thleng dawn a ni tiin, vawiina zirlaite chu nakina ram leh khawtlang hruaitu turte an nih angin taima taka zir tur leh ruihhlo laka inthiar fihlim tlat turin a fuih a ni.

Tukina Teacher's Day puala inkhawm tawi buatsaihah hian zirtirtu ṭha thlan chhuahte hnenah chawimawina parṭhi hlan a ni a. Pu GS Zaithantluanga, Headmaster, Govt Diakkawn High School, National Teachers Award, 2018 dawngtu te; Pu Lalrinmawia Ngente, State Teachers Award, 2012 dawngtu te; Pu R. Lalzokima, Headmaster, Govt TS Luaia Middle School, State Award for Meritorious Teacher, 2017 dawngtu te; Pu H. Lalremliana, Headmaster, Govt Diakkawn Middle School-II, District Teachers Award, 2008 & State Teachers Award, 2010 dawngtu te chu parṭhi awrhtir an ni a. MZP Headquarters, Kolasib leh MSU Kolasib District kaihhruaiin Kolasib khaw chhung school hrang hranga zirlaite chuan zirtirtute chawimawina thuziak kenga kawng zawhin, DC Office tual zawl; Kumtluang Run, Vengthar leh Banglakawnah te an au rual a ni.