1756/2023-2024

Vawiin khan School Education Minister Pu Lalchhandama Ralte chuan East Lungdar-a Thangburha Hall-ah East Lungdar Zirna centenary lawmna khuallian niin a hmanpui.

Pu Lalchhandama Ralte chuan East Lungdar Zirna centenary lawma kalkhawmte hmaah thusawiin E.Lungdar-in zirna an dahsang a, centenary hial an lawm chu ropui a tih thu a sawi a, zirna dahsang khua hi engtik lai mahin an te ngai lovang a ti. Kumina State Award to Teachers-ah he khuaa mi Pu Lalengliana Chawnghlut  thlan a ni chu phu hlea a hriat thu a sawi.

Minister chuan UPSC a Mizo țhalaite an tlin mai theih loh chhan kan inzawt țhin a, zirnaah hian ram mamawh chhanna pe turin chhungkua leh khawtlang hian zirna hi No 1 ah kan dah a ngai a ni a ti. Minister chuan Mizoram sorkarin zirna hi ngaih pawimawhah a neih avangin sum harsa leh hripui karah zirtirtu 2700 chuang lak an ni tawh a ti.

Minister chuan mipuiten sorkar an thlawp țhat avangin India ram state danga an tih theih loh covid hripui len laiin kum 2020, 2021 leh 2022 ah te Board Exam hlawhtling takin offline-a buatsaih a ni a, hei hian sorkarin zirna a ngaih pawimawhzia leh quality education vawnțhat a duhzia a lantir a ni a ti.

Țhangtharten he ram leh hnam  hmangaihna an theih nan sikulah Ro min relsak ang che tih hnam hla chu zah taka sa țhin turin tih a ni a, naupangten Mizo nunphung an hriat nan Zonun tih chu zirlaibuah hman a ni a, mahni țawng ngeia Science leh Mathematics an zir theih nan Bilingual textbook siam a ni a, naupang te zualte zirlaibuah Zirtirh Bu leh Nambar Bu te siam thar leh a ni a. Zirlaibua milem langte chu hnamdang hmel ni lovin Mizo hmel tihlan a ni a ti bawk.

Minister chuan zirlaite chu Lalpa țihna nen lehkha zir turin a chah a. Zu leh ruihtheih thila inhmang lo tur leh mipat hmeichhiatna laka inthiarfihlim turin a chah bawk.

East Lungdar Zirna Centenary Lawmna hi September 4 zan ațanga zanin thlengin hman a ni a,  hemi hun chhung hian Bazar Kawnah Centenary lungphun chu Pu Nuchhuni kum 101 mi chuan a  hawng a. Zirnaa mi hlawhtlingte, Zirnaa mi hmasate leh State Awadee to Teacher 2023 Pu Lalengliana Chawnghlut  hnenah chawimawina  an hlan.

Zirna Centenary  lawmnaah hian School Education Minister hi School Education Department Addl Director Pu Lalhmachhuana leh Serchhip DEO Pu Lallawmawma ten an țawiawm a. Sikul naupang leh zirtirtute, khawtlang hruaitute, he khuaa sorkar hnathawk te leh zirnaa hlawhtling an chawimawi te an tel a ni.