Kolasib leh Bairabi inkar NH-154 hi double-lane road-a siam mek a ni a. A hna hi Contractor pathum - (1) M/s Baghya Kalita (2) G.P.Infrastructure Project Pvt. Ltd. leh (3) M/s Sweety Real Estate Pvt. Ltd. te hnenah a kawng pumpui hi package thuma thenin a hrang theuhva package tin hi pek fel vek tawh a ni. A kawng double-lane a siam leh hemi an thawh chhunga a kawng enkawl (maintain) hi heng contractor te mawhphurhna a ni a, an mawhphurhna ang ngeiin an chan chhung theuh kawng enkawl hi thawhtir mek an ni. A kawng hmangtu ritphur Truck ten harsatna an tawh thulh pawha rang taka pui thei turin contractor te hi a kawng chhe zual leh harsa zual laiah khawl daha vil reng tura hriattir an ni a. Contractor te hian tun dinhmunah chuan khawl pathum dahin heng kawng harsa zual lai leh motor tan theihna hmunte hi an vil reng bawk. Amaherawhchu, double laning hna hi thawh lai mek a nih avangin kawng tha pangngai ang tak chu a la ni thei lova, hetia kawng siamthat a nih chhung hi chuan mipui tan pawh harsatna engemaw chen chu a awm ang tih PWD chuan hriain pawi an ti hle a, kawng siam lai mek a ni tih hriaa mipuite pawhin lo hriatthiampui turin an ngen a ni.