4463/2025-2026

Bilkhawthlir, the 13th February 2025: India ramin ei tur hriak (edible oil) a intodelh theih nana hmalakna kal zelah, vawiin khan Kolasib District Agriculture Department bultumin Bilkhawthlir Chemphai-ah 'Hawite Kut' leh thlai hriak leh be chi chin uar beihpui thlakna hun hman a ni a. He hun hi Kolasib Bawrhsap Pu Robert C Lalhmangaiha chuan Khuallian niin a hmanpui.

Khuallian Pu Robert C Lalhmangaiha, DC Kolasib chuan Hawite chin dan ziahna bu (pamphlet) chu a duh apiangte chhiar theih turin a tlangzarh nghal a. Kalkhawmte hnenah thu sawiin, District Agriculture Office chuan loneituten hlawk zawka hna an thawh theih nan leh hma an sawn zel theih nan hma an la reng a ni, a ti.

Bawrhsap chuan, "India ram chu kum 2047-ah chuan thlai hriak leh be lam chia intodelh turin hma a la chho mek a. Hawite hriak hi hriselna atan a tha em em a, chuvangin kuthnathawktute pawhin kan chin uar deuh deuh a pawimawh a ni," a ti a. Loneitute chu beidawng lova taima taka hma la tur leh, Department hotute nen tangkawpa hlawhtlinna chang ngei tura fuihin, Hawite hmun chu mipui tlawh theih turin a hawng nghal bawk a ni.

He hun hi Pu Joseph Lalnuntluanga, DAO Kolasib chuan kaihruaiin, Bilkhawthlir Chemphai-a Hawite chin beihpui thlak hi 'Thingdelh FIG' te hmalakna a nih thu a sawi a. Chemphai leilet chu buh chin loh lai (off-season) a awl mai mai loh nan leh loneitute tan sum lakluhna hnar dang a nih theih nan hman tangkai a nih thu a sawi. Pu Joseph-a chuan, "He Hawite Kut hi Mizoram-a Agriculture hmanga tourism (Agri-Tourism) tihhmasawnna atana rahbi pawimawh tak leh bultanna a ni," a ti bawk.

Vawiina hawn tak 'Hawite Kut' pual hian a hmunah stall eng emaw zat siam a ni a, sangha man thar lei tur chhawpchhuah niin, tlawhtu a duh apiang tan a hmun hi tlawh theih a ni ang. Hemi bakah hian khualzin, riak duh te tan man chawi a riahna buk (accommodation) buatsaih a ni bawk.