4462/2025-2026

Lunglei, 2026 Ramtuk thla ni 13: Lunglei District Bawrhsap (Deputy Commissioner) bul tuma mipuite'n an kawtkaiah ngei an mamawhna zawna sawrkar an dawr theihna hun, "I Kawtkaiah Sawrkar" (Prashasan Gaon Ki Ore) chu vawiin khan Bunghmun RD Block chhunga Buarpui leh a chhehvel khaw mipuite tan Power & Electricity Mual, Buarpuiah buatsaih a ni.

Bunghmun Block Development Officer Pu Paul Rokima'n hun kaihruaiin, "I Kawtkaiah Sawrkar" buatsaih chhan a sawi fiah a. Lunglei Sub-Deputy Commissioner Pu H. Lalthlengliana'n DC hma laknaa "I Kawtkaiah Sawrkar" buatsaih tawh dan report pein, department hrang hrang ai awhte'n service hrang hrang an pek theihte an sawi fiah a. Buarpui Village Council President Pu Zakhuma chuan mipui dawr theiha inpho chhuak department leh office hrang hrang hnenah lawm thu a sawi.

Buarpuia "I Kawtkaiah Sawrkar" hun buatsaihah hian department hrang hrang — Deputy Commissioner Office, Block Development Office, Health & Family Welfare, AH & Veterinary, Women & Child Development (ICDS), Agriculture, Horticulture, Public Health Engineering, Land Revenue & Settlement Department leh Mizoram Rural Bank te'n stall hawngin, awlsam zawka mipuite dawr theih turin an inpho chhuak a. Lehkha pawimawh hrang hrang (Aadhaar, ST/Residential/Income Certificate, Job Card, Land Pass, etc.) siam thar/siam ṭhat te, bank account hawn thar leh service hrang hrang te, mihring leh ran inentir leh hri danna pek te, sawrkar ruahmanna hrang hrang chungchang inzirtirna leh inziah luhna te buatsaih a ni a. He'ng service hrang hrang chhawp chhuahte hi mi 450 velin an chhawr ṭangkai a ni.