4461/2025-2026

Lunglei, 2026 Ramtuk thla ni 13: Lungleia Agriculture Technology Management Agency (ATMA) District Exhibition buatsaih tura Organising Committee chu vawiin khan an Chairman, Lunglei District Agriculture Officer & Project Director (ATMA) Dr Samuel Lalliansanga hovin a hna thawh pindanah an ṭhu khawm.

He ṭhut khawmah hian Agriculture, Horticulture, AH & Veterinary, LRS&WC (Soil), Sericulture, Fisheries, Krishi Vigyan Kendra (KVK), District Rural Development Office, I&PR, NEIDA leh MJA ai awhte an tel a. ATMA District Exhibition buatsaih tura inbuatsaihna tur thil ṭul hrang hrang an sawi ho.

ATMA District Exhibition hi February ni 27 & 28, 2026 (Zirtawpni & Inrinni) khian Agriculture Complex, Lungleiah buatsaih a ni dawn a. Agriculture leh a kaihhnawih department-te'n an department leh an hnuaia kut hna thawktute thil deh chhuah pho chhuahna tur leh kut hna thawktute hriat tur hrang hrang chhawp chhuahna tur stall hawngin, MzSRLM hnuaia Self Help Group-te leh NEIDA te bakah, District pawn aṭangin kut hna thawktute buaipui leh kaihruai thei tur agency te'n stall an hawng dawn bawk a. Stall 25 vel awm tura ruahman niin, he'ng stall-ah te hian department mi leh sate bakah, kut hna thawktu thlan bikte an inpho dawn a ni.

ATMA District Exhibition hawnna hun hi February ni 27, 2026 (Zirtawpni) zing dar 10:00-ah Agriculture Complex, Lungleiah buatsaih tum niin, Agriculture & Farmers Welfare Department Secretary Pi Ramdinliani chu Khuallian tura beisei a ni a. A kharna hun hi February ni 28, 2026 (Inrinni) chawhnu dar 2:00-ah buatsaih tum niin, Lunglei West bialtu MLA Pu T. Lalhlimpuia chu Khuallian atan sawm ni se, tih a ni.

ATMA District Exhibition-ah hian kut hna thawktute thil deh chhuah hrang hrang man man zawka lei theiha chhawp chhuah a nih dawn bakah, AH & Veterinary Department leh KVK te'n ran leh thlai hriselna dinhmun endikna (Animal & Plant Health Clinic) an buatsaih nghal dawn bawk a. Ran vaccine leh damdawi hrang hrangte a ṭul leh remchan dan anga sem/pek theih tura ruahman a ni.

ATMA District Exhibition-ah hian thlai leh thil dang pho chhuahteah intihsiakna siam lovin, department hrang hrang hnuaia kut hna thawktu ṭha thlan chhuahte hnenah "Best Farmer Award" hlan tum a ni.