2719/2025-2026 
Kolasib, December 18, 2025 : Vawiin khan DC Conference Hall, Kolasib-ah District Level Narco Coordination Centre (NCORD) Committee chu an Chairman, Kolasib Bawrhsap Pu Robert C. Lalhmangaiha hovin an thukhawm. He hunah hian Pu Lalrinpuia Varte, SP Kolasib bakah Police, Excise & Narcotics, Joint VC leh Sub Hqrs YMA aiawhte leh NCORD member dangte an tel a ni.

Thutkhawmna kaihruaitu, Chairman Pu Robert C. Lalhmangaiha chuan NCORD chu ruihhlo do na kawnga beihpui thlakna atana pawimawh tak a ni, a ti a. Sorkar-in ruihhlo dona kawnga dan a duan te chu tha taka kenkawh a nih theih nan Police, Excise leh Sawrkar Department dangte leh pawl hrang hrangte chu theihtawp chhuah turin a chah . Bawrhsap chuan Krismas leh Kumthar lo thleng turah mipuiten hlim leh muang taka hunpui an hman chu a duhthusam a nih thu sawiin, ruihhlo leh buaina tel lova boruak muanawm hnuaia hunpui hman a nih theih nan member kalkhawmte chu anmahni zawn theuhvah tan la turin a chah bawk a ni.

He hunah hian Pu Lalrinpuia Varte, SP Kolasib pawhin thu sawiin, ruihhlo khuahkhirh na kawngah Kolasib Police te hmalakna hrang hrang a tarlang a. Kolasib District chhunga ruihhlo luhna kalkawng (routes) te tarlangin, ruihhlo danchahna kawngah khawtlang leh YMA hruaitute thawhpuina a ngen a. Krismas leh Kumthar him taka hman anih theih nan Kolasib Police pawhin ruahmanna fel tak an siam tawh thu a tarlang bawk.

Vawiin NCORD meeting-ah hian Police leh Excise Department atangin an hmalakna report te ngaihthlak a ni a. Kolasib Police report tarlan a nih danin kumin November ni 17 atanga December ni 18 chhung khan ruihhlo (Heroin) gram 83.55 manin, ND&PS Act hnuaiah case pakhat an ziaklut a. Zu (IMFL) bottle 1320 (750ml) man bawkin, MLP Act hnuaiah case 1 ziah luh a ni bawk. Hei bakah hian Police Station hrang hrangin an huamchhung theuhvah Awareness Campaign an nei a, District Tobacco Cell te nen tangkawpin COTPA compliance week an hmang bawk a ni.
Excise and Narcotics Department pawhin report pe in, November ni 7 atanga December ni 15, 2025 chhung khan Zu (Rakzu, IMFL, Yeast leh Beer) chi hrang hrang an man te belhkhawm hlutna (value) chu cheng 17,79,595/- a tling tih an tarlang bawk.

NCORD (Narco Coordination Centre) hi Ministry of Home Affairs (MHA) ruahmanna hnuaia ruihhlo do tura din a ni a. State, District leh Block level-ah te Committee din niin, ruihhlo tawlh ruk leh hmansualna(drug trafficking and abuse) do turin Sawrkar Department hrang hrang te leh pawl hrang hrang aiawhte inrawnkhawmin hma an la thin a ni.