2720/2025-2026

Lunglei, 2025 Pawltlak thla ni 18 : National Highways & Infrastructure Development Corporation Limited (NHIDCL) te'n Young Mizo Association (YMA), Sub-Headquarters, Lungleiin ram leh mipui rawngbawlnaa an hman atana Corporate Social Responsibility (CSR) kal tlanga damlo phurhna tur, "Ambulance" (Force Trax Van) an pek chu vawiin khan Lunglei District Bawrhsap Pi Navneet Mann chuan Lunglei Sub-Headquarters YMA hruaitute kutah a hlan.

Thilpek inhlanna hun hi Lunglei DC Office tualah buatsaih niin, NHIDCL aṭangin General Manager (Project) Lt Col. SG Dwivedy leh Senior Manager (Project) Pu Ruhul Amin Choudhury, Lunglei Sub-Headquarters YMA aṭangin President Pu K. Lalfakzuala leh Vice President Pu CMS Dawngliana, leh Lunglei DIPRO Pu C. Lalhruaitluanga te an tel a. Bawrhsap Pi Navneet Mann chuan lirthei chabi leh lehkha pawimawhte chu Sub-Headquarters YMA President Pu K. Lalfakzuala kutah a hlan a ni.

Lunglei District chhunga national highway kawngpui zauh leh siam ṭhat mek enkawltu NHIDCL-in CSR aṭanga Lunglei Sub-Headquarters YMA hnena Ambulance an pek hi a lirthei leh a cheibawlna zawng zawng nen cheng nuai 16 (₹16,00,000/-) man a ni.