2721/2025-2026

Lunglei, 2025 Pawltlak thla ni 18 : Vawiin khan Lunglei District Agricultural Marketing Committee (DAMC) chu Additional Deputy Commissioner Pi Zoramdini kaihhruaiin Lunglei DC Conference Hall-ah an ṭhu khawm a. Mizoram Bana Kaih (Handholding) Scheme Phase-II kal tlanga Lunglei District chhunga thlai thar lei kawnga DAMC hma lakna tur hrang hrang an sawi ho.

Assistant District Agriculture Officer Pu K. Lalrinfela'n thu ngaihtuah tura chhawp chhuahte a sawi zau bakah, kum 2026-a thlai thar lei leh hralh kalpui dan tur chungchanga Mizoram Agricultural Marketing Board (MAMB) ruahmanna a sawi fiah a. MAMB ruahmanna zul zuia Lunglei District-a thlai thar lei leh hralh kalpui dan tur bakah, hlawhtling leh felfai taka kalpui a nih theih nana hma lak dan turte sawi ho zui a ni a. Kum 2026 January ni 13 (Thawhlehni)-ah Lunglei District chhunga Secondary Collection Centre (SCC) hrang hranga mawhphurtu - Supervisor, Chairman, Secretary leh Treasurer te tan Lungleiah Bana Kaih Phase-II kalpui dan tur leh hriat tur pawimawh hrang hrang zir hona (training) buatsaih ni se, tih a ni.

MAMB-in December ni 5, 2025-a Office Order a tihchhuaha kum 2026 chhunga Mizoram Sawrkarin MAMB kal tlanga sawhthing leh hmunphiah ro a leisak (support price a pek) dan tur ruahmanna tar lan a nih danin, Secondary Collection Centre (SCC) kal tlanga sawhthing support price pek theih hun chhung (SCC-a sawhthing lak theih hun chhung) chu February ni 2 aṭanga May ni 30, 2026 inkar a ni dawn a. Sawhthing support price hi primary society member-te thar chhuah chauh pek tur niin, Buffer Stock Point siam tawh lovin SCC aṭangin sawhthing hi hralh chhuah vek tur a ni dawn a. Primary society member-te sawhthing thar chhuah chu Primary Collection Centre (PCC)-a chhinchhiah fel a nih hnuah chauh SCC-ah kalpui tur niin, PCC hriatpuina lehkha nei lote chu SCC-ah sawhthing an hralh phal a ni dawn lo va. Sawhthing support price dawn beisei lo (claim tum lo)-te chuan an duh dan ang leh ṭha an tih angin eng tik lai pawhin an hralh thei thung ang.

Mizoram Sawrkar chuan ZOHANDCO kal tlangin hmunphiah ro grade-a ṭhen loh (thliar fel loh) kilogram (kg) khat ₹80/- zelin February ni 2 aṭanga March ni 31, 2026 chhungin SCC-ah a lei dawn bawk a. Hmunphiah chingtute'n kg khat ₹80/- leh a aia tova hralhna an hria emaw, ZOHANDCO hnena hralh kher an tum lo emaw a nih chuan ṭha an tihna hmun apiangah leh hmunphiah leitu an duh apiang hnenah an hralh thei ang a. Hmunphiah ro hralhnaah hian support price pek theih a ni lo vang. Hmunphiah ro lei duhte Deputy Commissioner/Chairman, DAMC-ah registration tih kher a ngai tawh lo va, Sawrkarin rate a siam anga an lei duh a nih chuan eng tik lai pawhin an duhna hmun apiangah hmunphiah ro an lei thei ang a. Hmunphiah ro lei turte chuan Land Resources, Soil & Water Conservation Department-ah Certificate of Origin an dil ang a, chumi hnuah Transit Pass chu Environment, Forests & Climate Change Department-ah dil leh theih a ni ang.