No.7197/2020-2021 

Vawiin chawhma khan DC Conference Hall, Kolasibah “Fimkhur La, Nun Chhanhim Rawh” tih thupui hmangin ‘Road Safety Month 2021’ chu Khuallian Dr. H. Lalthlangliana Bawrhsap in a hawng.

Dr.H.Lathlangliana chuan tunlai chhuak lirtheite chu a changkangin an thuam tha hle tawh a, hemi avang hian lirthei chetsualna kawngah pawh lirthei khawl fel lohna vang aiin lirthei khalhtu fimkhur lohna vang a thleng a tam thu a sawi a,” Lirthei accident chhan tam tak hi a khalhtute ruih theih thil a an fihlim loh vang a ni duh viau a ni,” a ti a, hemi kawnga hma la tur hian Driver Association hruaitute leh Department a thawktute thawhho that a pawimawh thu a sawi bawk a ni. Bawrhsap chuan lirthei khalh tur chuan taksa pawh enkawl that a tul thu sawiin taksa rim lutuk avangin lirthei chetsualna a thlen theih thu a sawi a, midang fimkhur zawkte chungah pawh nasa takin chhiatna a thlen phah theih thu a sawi. Road Safety Month 2021 chu Lirthei hun dan kawng a dan zawm ngaite, Police vang ni lova mahni sa himna vang zawk a helmet khum tur kan nih ziate leh Traffice rules-te ngaih pawimawh a nih lehzual nana hun tangkai tak a nih ngei a beisei thu Bawrhsap chuan a sawi bawk a ni. 

Pu Vanlalfaka Ralte, SP chuan Kolasib district chhung ah 2019 chhung khan lirthei chetsualna tum 6 thleng zingah nunna chan 3 an awm thu a sawi a, 2020  chhung a lirthei chetsualna tum 8 thleng zinga tum 6-ah nunna chan an awm thu a tarlang bawk a ni. Lirthei vanga chetsualna tam zawk chu fimkhurna nen chuan pumpelh theih a nih thu sawiin chak tak tak a tlan te, kum tling lo lirthei khalh tir te leh rui chung a lirthei khalhte chu chetsualna thlentu a nih thu a sawi bawk a ni.

Road Safety Month 2021 hawnna hun hi Pu.C.Lalawmpui, DTO, Kolasibin kaihruaiin Department hrang hrang hotute, khawtlang hruaitute, Kolasib Truck Driver Association leh Lirthei zuar a sumdawng ten an telpui a, Pu Vanlalvena Pachuau, ADTO in lawmthu sawina hun a hmang bawk a ni. Road Safety Month hian 18th January atangin 17th February, 2021 thleng a huam dawn a ni.