RMSA, SSA leh Social Welfare Department te tangkawpa huaihawt World Disabled Day cum Special Olympic , Kolsaib District chu vawiin khan Integrated School, Kolasib ah Bawrhsap Pu R Zarzosanga’n a hmanpui.

He hunah hian khuallian chuan thu sawiin “khawvel kan thlir chuan rualbanlo te hi mi ropui tak tak ah an chhuak fo tawh a, chung zingah chuan Ziaktu ropui, Political Activist, Zirtirtu tha leh mi dangte tana mi inpe zo tak Hellen keller (bengngawng leh mitdel), Thawnthu ropui tak tak ziaktu greek Pachal Homer(mitdel), Ke bul vanga hnual duhlo ke lem (blade) hmanga tlan thin, tlanchak hmingthang Oscar Pistorius te an awm a ni” tiin he huna kalkhawmte chu midang an phaklohna leh midang aia an vanduaina chu  hnual phah nan hmang mai loin tumruhna neih phah nan hmang turin a fuih a, chu chuan midang thlen chin a thlentir thei anga midang chungah pawh an leng thei a ni a ti a, an dinhmun chu Pathianin a theihnghilh ngailoh avangin beidawng loa hmalam pan zel turin a chah bawk a. Mihring mamawh bik neite (Differently abled persons) chu Sawrkar pawhin a ngaituah hle a ni tiin hna zawnna kawngah pawh a hna leh an rualbanloh dana zirin 3% reservation a dahsak thu a tarlang a, Mizoram ah ngei pawh Commissioner for Persons with Disabilities kaihhruaina hnuaiah Sawrkar in a enkawl thu a tarlang bawk a ni.

International Day for Persons with Disabilities hi Kum 1992 atangin kumtin December ni 3 ah hman thin a ni a, Mizoram ah pawh kum 20 vel hman a nih tawh thu tarlan a ni a. Kumin hi Pathianni a a tlak avang leh Naupang thenkhat ten Exam an neih avangin Kolasib ah chuan  hun dang remchang zawk (vawiin) ah hman a ni a. He hun ah hian Salvation Army Integrated School, Blind Hostel leh Gosen Special School atangin Mihring mamawh bik neite (Differently abled persons) an tel tha hle a, thil chi hrang hrang heng Zai, Musical Chair, Race, Arm Wrestling, Balloon thutkeh leh Tug of War te hmanga intihhlimna hun hman a ni a. Report kan dawn danin Kolasib District a RMSA hnuaia Inclusive Education for Disabled at Secondary Stage (IEDSS) a inziaklut hi Rualbanlohna chi hrang hrang nei mi 145, SSA hnuaiah mi 500 niin heng  mamawh bik neite tan hian thil chi hrang hrang heng Zirtirtu (Special Educator), Zirlaibu, Hostel Allowance, Blind reader Allowance, Escort Allowance, Tarmit, Wheelchair, tiang, Crutch leh a dangte an tumsak thin a ni.