2199/2026-2027

Kolasib, 14th September, 2026: Vawiin chawhma dar 11:00 khan DC Conference Hall, Kolasib-ah Kolasib Bawrhsap Pu H. Dolianbuaia kaihhruaiin Kolasib District chhunga 4-Lane NH-306 & 06 siam hna thawh mek chungchang leh a kaihhnawih harsatna hrang hrangte chinfel dan tur sawiho a ni.

He hunah hian thutkhawm kaihruaitu Bawrhsap Pu H. Dolianbuaia chuan fur ruahtuiin ziaawm lam a pan chhoh tawh dawn avang leh favang hun  kan chuangkai chho dawn tawh  avangin kawng siamtu contractor-te chu thahnemngai taka theih ang anga hna thawk turin a chah a. He 4-Lane kawng siam mekin Mizoram mipuite tana pawimawhna a neih thuk zia a sawi lang bawk.

Bawrhsap chuan Package 7 huam chhunga ram neitu thahnem takin zangnadawmna (compensation) an la dawng lo chu pawi a tih thu a sawi a. "Heng zangnadawmna la dawng lote hi mi harsa tak tak, an ram leh hmunhmate eizawnna leh intunnun nana hmang an ni hlawm a. Chuvangin, heng zangnadawmnate hi a hma thei ang bera an lak theih nan NHIDCL-te hian theih tawp in chhuah a ngai a ni," tiin a chah a ni.

He thutkhawmah hian NHIDCL official-te leh ram neituten an din Joint Action Committee, Fourlane hruaitute hnen atangin thu ngaihthlak a ni a. Competent Authority for Land Acquisition (CALA) leh Addl. DC ni bawk Pi B. Malsawmtluangi pawhin, ram neituten an chanvo dik tak an neih ngei theih nan tun aia nasa zawka hma la turin NHIDCL hotute a chah bawk a ni.

Vawiin thutkhawmah hian Addl. DC (CALA), DIPRO, NHIDCL PMU-Kolasib official-te, Package 3, 4, 5, 6 leh 7 contractor-te bakah Joint Action Committee, Fourlane President leh hruaitute an tel a ni.