2200/2026-2027

Aizawl the 14th September 2026: Vawiin khan Chief Minister Pu Lalduhoma chuan Mizoram Hindi Prachar Sabha bultuma Dawrpui Multipurpose Hall-a neih Hindi Diwas Day chu khuallian niin a hmanpui. Education Minister Dr. Vanlalthlana chu khualzahawm a ni.

Thu sawiin Chief Minister chuan, kan culture nen Hindi i thiam ang u. Hindi thiam hi a tha a ni satliah lo, a tulin a tul tawh zawk a. Amaherawh chu, Hindi kan thiam vang emaw thiam kan duh vang emawa an hnamzia entawn kher kha a tul lem lo. Mizo takin Hindi tawng thiam ila, an hla i sa ang u. Chutianga kan tih loh chuan kan hnamzia kan hloh tial tial ang a, kan sakhua thlengin min hliau thei a ni. Mizote hian kan tawng leh kan culture-te hi tiral lovin kan tilian zel zawk tur a ni.

Sorkar laipuiin Hindi a uar tial tial a, Hindi thiam lo tan chuan kan duh leh kan duh loh thilte kan sawi chhuak thei lo fo va. Mi fel tak pawh kha a fel tih a hriat theih loh thin. Chuvang chuan, Hindi hi kan thangtharten rawn thlahthlam lo vang che u, a ti.

MP a nih laia Mizorama Hindi zirnain hma a sawn theihna tura hma a lak tawhnate a tarlang a. MP a nih laia a hmalakna zarah khan kum 1988-ah Mizoramah Hindi pawl sawm (Metric) leh PU (Intermediate) Exam phalna (Recognition) central sorkar chuan a rawn pe a. A hnu lawkah kum 2000 khan BA Exam phalna a rawn pe bawk a ni.

Chief Minister chuan, tunah chuan Hindi thiam kan lo ngah ve tawh hle a, Primary leh Middle School-a kan Hindi Teacher te chu Mizoram Hindi Prachar Sabha te chherchhuah an lo ni deuh vek tawh a, Mizoram Hindi College-a kan thawktute chu Mizo nula leh tlangval an ni deuh vek bawk a, Hindi Doctorate Degree nei pawh 20 chuang kan lo nei ta a. Kan hmathlirte kha a takin a rawn chang chho ta zel a ni a ti a. Mizoram Hindi Prachar Sabha leh Hindi zirlai naupang zawng zawngte chu duhsakna a hlan a ni.

School Education Minister Dr. Vanlalthlana, khualzahawm pawhin thu sawiin, "Education Reforms Committee chuan Hindi Speaking Day hman tha a ti a, thla khatah ni khat talin bul tan kan rel a". Hindi thiam hi hnam dangte nena kan inpawhna leh kan eizawnna atana thil tul a ni, a ti. Hindi Subject-a Ph. D neite lawmpuiin Mizoramin Hindi Ph. D hi 20 chuang kan nei tawh a, kan neih belh zel pawh kan ring a ni, a ti. Mizoram Hindi Prachar Sabha-in Aizawl Traffic Police te Hindi Spoken Course a lo pe chu lawmawm a tih thu sawiin Taxi Driver te pawh hian a tlanglawn hi chu thiam se a tha hlein ka ring a ni, a ti bawk.

Inkhawm hi Pu Lalchungnunga, Vice President, Hindi Prachar Sabha chuan a kaihruai a, Rev. RK. Lalawmpuia chuan hunserh a hmang a, Pu RB Lalmalsawma, Chairman, Mizoram Hindi Prachar Sabha chuan thu a sawi bawk.

He hunah hian Hindi Subject-a Doctorate Degree nei tharte hnenah leh Traffic Police Spoken Hindi Course kal chhuakte hnenah chawimawina hlan an ni a, zirlai naupangten zai leh lamin hun an hmang bawk.