2201/2026-2027

Kolasib, 14th September, 2026: Vawiin chawhma dar 10:00 khan DC Conference Hall, Kolasib-ah Kolasib Bawrhsap Pu H. Dolianbuaia kaihhruaiin, Smt. Raksha Nikhil Khadse, Hon'ble Union Minister of State for Youth Affairs & Sports, Government of India-in Kolasib a rawn tlawh tur lo dawngsawng tura inbuatsaihna chungchang sawiho a ni.

He thutkhawmah hian Kolasib District chhunga Head of Office (HoO) te an telkim hle.

Thutkhawm kaihruaitu Bawrhsap Pu H. Dolianbuaia chuan Union Minister lo kal tur chu ruahmanna felfai tak nena lo dawnsawn a nih theih nan department hotute chu an ngaihdan leh rawtnate thawhkhawm turin a chah a. Minister hmaah hian thil pawimawh hrang hrang thlen a nih dawn avangin, department hotute chu an department hmalakna hrang hrangte naktuk ral hmaa thehlut  vek turin a hriattir nghal bawk a ni.

Union Minister of State, Smt. Raksha Nikhil Khadse hian ruahman lawk angin September ni 16, 2026 (Nilaini) khian Kolasib a rawn tlawh dawn a. Chhun dar 12:00 ah Kolasib Circuit House lo thlengin, hemi hnu dar 12:15 hian Saidan-a Regional Sports Training Centre (Football Academy) a tlawh ang a. Dar 12:30-ah Project Veng-a Kolasib Sports Stadium hmunhma te kalin a enfiah leh bawk ang.

Heng infiamna hmunhmate a enfiah zawh hian chhun dar 1:20-ah DC Conference Hall, Kolasib-ah District chhunga Department Official-te, tlawmngai pawl (NGOs), Mizoram Journalists' Association (MJA) leh District Sports Committee te nen inkawmhona leh thutkhawmna hun an hmang ang a. Tlai dar 2:00 ah Aizawl panin Kolasib a chhuahsan leh dawn a ni.