2202/2026-2027

Aizawl the 14th September, 2026: Vawiin khan FCS&CA Minister Pu B. Lalchhanzova Pisa ah Indradhanush Gas Grid Limited (IGGL)-in Tripura a Panisagar atanga Sihhmui, Mizoram thlenga Natural Gas kalna tur pipeline phum chungchanga hmalakna leh harsatna awm te sawi ho a ni.

Pu B. Lalchhanzova chuan khawvel boruak ralmuang lo leh gas kan chawk luhna ram te an indo avangin ei rawngbawlna gas ah kan phang a. Gas Pipeline atanga natural gas hmang state te erawh chuan harsatna an tawk lova. Mizoramah pawh March 2027-ah chuan hei hi hmang ve hman tura hmalak a ni tih sawiin, Tuidam leh Darlak inkar Km 1.5 tuna IGGL ten hna an thawh mek chu pipeline phumna turah harsatna an tawh thu IGGL hotuten an sawi a. Minister hian October thla chhunga IGGL, Food Civil Supplies and Consumer Affairs Department, Public Works Department leh DC Mamit te nen a hmunah ama hova en ni se tiin Department hotute chu ruahmanna siam turin a chah nghal a ni.

Minister chuan Mizoram Sawrkarin IGGL gas pipeline chu a hunah tha taka zawh a nih theih nan theihtawp a chhuah pui zel dawn tih sawiin FCS&CA bakah Commerce and Industries Dept. te pawh an inhawn thu sawiin Pu B. Lalchhanzova chuan IGGL leh Tripura Natural Gas Company Limited lam te ram mamawh pawh Land Acquisition a rang thei anga an tih fel sak zel thin thu leh hmalakna dang te pawh an umzui sak zel dawn thu a sawi a ni.

FCS&CA Secretary Pu Ravi Dadhich chuan contractor ten chak zawka hna an thawh theih nan IGGL hotute hnenah Mizoram a hnathawh chu thil awlsam tak a ni lo tih chu hna tan hmaa an hriat sa a nih avangin hei hi hnathawh muan nan chhuanlam a tling lo, a ti a. India Sawrkar project pawimawh, hunbi nei a nih angin tan mar a tul thu a sawi.

Meeting-ah hian Food Civil Supplies and Consumer Affairs Department Secretary Pu Ravi Dadhich-a hovin official te an tel a. PWD atangin Er. Robin Lalrinawma, Chief Engineer, PWD (Highways), leh Aizawl D.C. aiawhte bakah Video Conference in D.C Mamit leh IGGL hotuten an rawn zawm bawk a ni.

Vawiin vek hian Pu B. Lalchhanzova pisa-ah hian Land Revenue and Settlement Department hotute chu thukhawmin LR&S Dept. hmalakna te an thlir hova, department hmachhawp te an sawi ho. Pu B. Lalchhanzova chuan Revenue Department dawrtuten department a thawktute an fakna thawm a hre ta fo chu hmasawnna nasa tak ni a a hriat thu a sawi a, thawktute chu tan la zel turin a chah. 

Meeting-ah hian Revenue Department-a thawktu indaihloh phuhruk dan tur te, mimal ram buai chinfel ngai te, sawrkar ram mumal taka chhinchhiah zel dan tur te, department dang nena thawhho zel dan tur te, sawrkar sum hnar tihchak dan tur te leh thu pawimawh dang te a vaiin agenda 31 (sawmthum pakhat) an sawi ho a ni.

Pu B. Lalchhanzova chuan LR&S Dept. chu department inrelbawlna ruhrel siamthat leh mipui service tihhmasawnna lama thawk tha ber pawl a nih mek thu sawiin hmasawnna tur tam tak erawh a la awm a, thawktute chu tang mar zel turin a chah bawk a ni.