Sub -Hqrs YMA, Kolasib hmalakna hnuaia Zu leh Ruihhlo man te chu vawiin khan Kolasib Bawrhsap Pu R Zarzosanga’n Diakkawn vengah a hal ral.

Pu Zarzosanga chuan Zu leh Ruihhlo in kan ram thalai leh pavalai te nunna tamtak a suat mek a ni a ti a, Ruihhlo chuan ngaihsamna thlenin, chu chuan HIV/AIDS natna chu nasa taka a tih pun phah thu sawiin Ruihhlo do kawnga Sub -Hqrs YMA, SRS ,Kohhran hrang hrangte leh NGO hrang hrangte hmalakna chu fakawm a tih thu a sawi a hunpui lo awm tura Ruihhlo do dan tur chu District Administration pawhin a ngaituah tur thu a tarlang a ni. Ruihhlo do na kawnga Sawrkar Department kaihhnawih leh khawtlang kan tanrual chuan ruihhlo tawlhruk chu kan hneh hun ala awm ang a ti a ni. Pu Zarzosanga chuan Ruihhlo do na kawnga thahnem ngai taka tha thawhtu SRS te hnenah thingpui in na tur cheng 2000/- a hlan bawk a ni.

He hun hi Sub -Hqrs YMA, Kolasib President Pu C.Liangkunga’n a kaihruai a, Report kan dawn dan in Ruihhlo hal leh tihchhiat te hi Zu (A sen chi) um 384.5, Rakzu um 14 leh fun 8, Beer um 72, No.4 chhinte 410 leh Nap 10 (Nitrozepam) tablet 450 niin, hengte hi tualchhung rate in cheng 6,96,000/- man hu a ni. Hei hi kumin 2017 chhunga Kolasib a Ruihhlo hal leh tihchhiat tum hnihna a ni. He hunah hian Kolasib khawpui chhunga Branch YMA, MUP, MHIP leh Kolasib church leaders’ Committee aiawhin hruaitute an tel a ni.