1235/2026-2027

Kolasib, 30th June, 2026: Tukin zing dar 7:00 khan Kolasib Bawrhsap Bangla-ah Kolasib khawpui mawina tur pangpar khawina leh leitha, MHIP Sub-Hqrs Kolasib huamchhunga veng hrang hrangte hnenah semna hun hman a ni a. He hun hi DC Office Superintendent Pi Ngurzampuii chuan a kaihruai a ni.

Pangpar khawina sem chhuahna hunah hian khuallian, Kolasib Bawrhsap Pu H. Dolianbuaia chuan thu sawiin, Kolasib chu khualzin tam tak ten an paltlang thin khawpui a nih thu a sawi a. Khualzinte mit la tur khawpa khawpui mawi leh fai nih a chakawmin a tul hle a ni, a ti. Pangpar khawina tura ngaihtuahna sengtute chungah lawmthu sawiin, hei hi a bultanna chauh a la nih thu a sawi a. Kolasib khawpui huam chhunga sawrkar hmunhmate pawh phak ang tawka chei that leh tuai hnum a tum thu sawiin, he hmalakna dawngtu zawng zawngte chu khawpui a lo mawi zel theih nan thahnemngai taka tang turin a fuih a ni.

DC chuan faina kawngah Kolasib khawpuiin hma a sawn theih nan Village Council (VC) te mawhphurna pek an nih thu a sawi a. Ruihhlo dona kawngah YMA te hma la tura beisei an nih rualin, khawpui mawina kawnga hma la turin MHIP te chu mawhphurna pek an nih thu a tarlang a. Heng mawhphurna hrang hrangte hi thlahthlam lova thahnemngai taka bawhzui zel turin kalkhawmte a chah a ni. Kumin December thlaah hian 'Kolasib Night' buatsaih a nih tur thu sawiin, khawpui mawina tura pangpar khawi tha te, ruihhlo dona kawng leh veng fai inelnaah te lawmman sem tum a nih thu a tarlang bawk.

He hun hmanpuitu District Urban Development Officer (DUDO) Pu H. Lalramliana pawhin thu sawiin, thil ho tea lang pawh hi thil tha tak a nih theih thu a sawi a. Thil tam takah bul kan tan a, a enkawl zui kan tlin lo fo thin chu pawi a tih thu a sawi. Khawpui mawina kawngah ngaihtuahna sengtu DC kan nei chu a vanneihthlak hle a ni tiin, vawiina pangpar khawina dawngtute pawhin khawpui a lo mawi a, a felfai zawkna turin a enkawl zui lamah mawhphurna sang tak an nei a ni, a ti a. Khawpui fai inelnaah pawh Kolasib chu sang taka a thlen theih a beisei thu a sawi bawk.

Vawiin pangpar khawina sem chhuahna ah hian  Kolasib khawpui huam chhunga MHIP Sub-Hqrs hnuaia Branch hrang hrang - Rengtekawn, Tuithaveng, Khuangpuilam, New Diakkawn, Diakkawn, Venglai, Vengthar, Gosen, New Builum, Hmarveng, Tumpui, Venglai East, College Veng, Jail Complex leh Saidan te hnenah sem chhuah a ni.

Report-a a lan danin pangpar khawina plastic pot 220, plastic pot khai chi 12 leh tyre chei sa 176 sem chhuah a ni a. Veng tin MHIP te hnenah hian leitha bag khat theuh sem tel a ni a. Veng engemaw zatah chuan pangpar khawina hi a hma pawhin sem a lo ni tawh bawk a ni.