1234/2026-2027 

Aizawl, the 30th June, 2026: Remna Ni kum 40 tlin lawmna Ruby Jubilee puala Zoram Research Foundation leh Aijal Club tangkawp buatsaih, "From the Frontlines of '66 to 40 Years of Peace" tih thupui hmanga hun hman chu vawiin khan Mizoram Larsap General (Dr) Vijay Kumar Singh, PVSM, AVSM, YSM (Retd) chuan BSI Hall, Khatla, Aizawlah Khuallian niin a telpui a, "The Case Study of the Enduring Legacy of the Mizo Peace Accord" tih project a tlangzarh nghal bawk. 

Larsap General (Dr) Vijay Kumar Singh chuan kalkhawmte Remna Ni chibai bukin, Mizoram Peace Accord chu inremna danglam bik leh chhinchhiah tlak tak a nih thu a sawi a. Mizoram Peace Accord-in kum 40-na hmel a hmu leh ziah a nih hnuah Mizoramah engmah buaina a awm leh tawh ngai lo chu ropui a tih thu sawiin, remna leh muanna a awm theih nan mitinin tha an thawh avangin he inremna hi Mizoram mipui zawng zawngte ta a ni, a ti a. Mizoram Peace Accord chu inremna, hruaitu tha leh mipui sawrkar siam tura intiamna a taka puitlinna a nih thu sawiin, hei hian kum 20 ram buaina a titawpa, remna, nghehna leh hmasawnna a rawn her chhuah tir a ni, a ti a. Mizoram Peace Accord chu Northeast bakah khawvel puma inremna thuthlung entawntlak tak ti a hriat a nih thu sawiin, Mizoram mipuite chu hlut thiama chhawmnung zel turin a chah a ni.

Larsap chuan tunhma Mautam thleng chungchang tarlangin, mipuite tawrhna avanga harsatna thleng theite bakah a nghawng turte ngaihvena hmalak thuai a tul tih sawiin, harsatna lian zawk leh buaina nasa zawk a thlen loh nan mipui mamawh phuhruk leh chinfel zung zung hi thuneitute mawhphurhna a ni, a ti a. Underground ten inremna hmanga mipui sawrkar an zawm hnu kum 40 lai India rama state ralmuang berte zinga mi kan ni ta chu ropui a tih thu sawiin, remna leh muanna hnuaiah hian mipui sawrkar leh hmasawnnate chak takin a kal thei thin a ni, a ti bawk.

Hun kal tawhah ringawt insawrbing lova, Mizoram hmalam hun thlira Remna Ni Ruby Jubilee puala hun hman buatsaihtu Zoram Research Foundation leh Aijal Club-te hmalakna fakawm a tih thu thu sawiin, hun hman leh project tlangzarh takte chuan rah tha a chhuah ngei a beisei thu a sawi a. Khawtlang tihmasawn turin mahni inluma awm reng lova hawiher tizau tura state pawna vah chhuah tam a tul thu sawiin, kalkhawmte chu hmun dang atanga thiamthil zira thian siam turte, ngaihtuahna thar leh tha zawk neia state leh mipuite hmasawn nana ngaihtuahna seng turin a chah a. Mizoramin thiamna leh theihna nasa tak a nei tih sawiin, ram ralmuang leh zalen nihna anga kan chhawr tangkaia deuh deuh a pawimawh thu a sawi a. Mizoram Peace Accord thiltum leh min hnutchhiahte chhawmnunga tihlawhtlingtu nih tum turin a chah bawk. 

Remna Ni Ruby Jubilee pual hian StratNewsGlobal siam "Mizo Peace Accord Documentary Series" tih chu thlir ho a ni a. Pu Nitin A. Gokhale, Veteran Journalist, Conflict Reporter and Strategic Analyst kawmna ngaihthlak a ni a Pu Sanjoy Hazarika, Author & Filmmaker-in thu a sawi bawk.

Chawhnuah "Frontlines of the Past : Conversation with Veteran Press Corp" tih thupui hmanga hun hman chhunzawm niin, he hunah hian Pu C. Lalrosanga, IIS (Retd.), Former MP (Lok Sabha), Former Director General of Doordarshan; Pu L.R. Sailo, Former Director, Information & Public Relations Department; Pi Lalramliani Hnamte, Former Announcer & Newsreader, All India Radio leh Pu D.R. Zirliana, Former Editor, Mizo Aw Daily Newspaper ten hun an hmang a ni.