Nizan (zirtawp zan) khan Kolasib College Veng VC buatsaih in  VC house ah kumin a HSLC leh HSSLC pass thar te chawimawina neih ani a,he hun ah hian Pu Stephen Auhmun, APO(M), Kolasib DRDA office a mi chu khuallian ani.

Khuallian chuan zirlai pass thar te chu fuih in,tunlai khawvel ah intlansiakna a sang em em tawh a, hman laia matric pass ten hna tha tak tak an hmuh theih laiin tun ah chuan master degree leh doctorate degree nei te tan pawh hna thawh mai tur a vang tawh a,tum mumal neilova lehkha zir chu in sen thlawnna mai ani tiin kan thlen chin apiangah tha taka pass  zel kan tum tur ani,a ti.

Pu Stephen-a chuan,College veng a zirlai pass thar te chu tun atanga kum 5 chhungin MCS leh MPS ah emaw, service dang ah in hlangkai an awm ngei theih nan an zirna ah theih tawp chhuah turin a chah a,zirlai nih chhung chuan kohhran leh khawtlang ah pawh active lo ngam tura chah in,hemi kawngah hian nu leh pate, khawtlang hruaitu leh kohhran hruaitute pawhin hriatthiamna zau tak kan neih a tul ani,a ti bawk.

Khuallian chuan,mobile phone changkang leh incheina atana in senso vak vak ai chuan hriatna min petu lehkhabu lei thin turin kalkhawm te a chah a,tih tak takna leh chhelna tello chuan tunlai khawvel ah hlawhtlinna a awm tawh lo ani,a ti bawk.

He hun hi VCP Pu David Rothangpuia'n kaihruai in, VC aiawh leh nu leh pa aiawh ten thutawi an sawi a,College veng a cheng HSLC pass thar mi 15 leh HSSLC pass thar mi 17 te hnenah lawmpui nan JF Laldailova siam dictionary leh pen pakhat theuh pek anni.Nu leh pa leh zirlai pass thar thahnem tak an kalkhawm.