Vawiin khan Mizoram Chief Secretary Pu Arvind Ray, IAS chuan Kolasib a tlawh a, Kolasib Bawrhsap Dr. Arun T, IAS, Addl Dc Pu Laltanpuia Hnamte MCS leh Kolasib khawpui chhunga Sawrkar Department hrang hrang Official te'n Circuit House ah an lo hmuak a, inkawmna hun tawi an neih hnuah Kolasib DC Conference Hall ah Sawrkar Department Hrang hrang leh khawtlang/NGO Hruaitu hrang hrangte nen inkawmhona hun an nei zui a ni.

Pu Arvind Ray chuan amah lo hmuaktu Kolasib District official-te leh khawtlang hruaitute chungah lawmthu sawiin Kolasib District-a sawrkar hna kalpui a nih dan leh hmasawnna ruhrel Project te a hmuna tlawh tura lokal a nih thu a sawi a. Tun dinhmunah Dan leh thupek kenkawh kawnga harsatna lian tham awm lovin boruak ralmuang tak hnuaia sawrkar hmalakna te kalpui a ni chu lawmawm a tih thu a tarlang bawk. District hmasawn zelna atan zirna leh hriselna a pawimawh hmasak thu sawiin Chief Secretary chuan Kolasib District mipui hriselna dinhmun te, damdawi ina khawl awmte, faina kawnga hmalakna te, zirna lam dinhmun te, kawlphetha leh tui supply dinhmun tlangpui te official kalkhawmte a sawipui a.

Bawrhsap Dr.Arun T chuan Kolasib District a Administration leh Department hrang hrang hmalakna lian zual bakah Kolasib District ina theihna (Potential) hrang hrang a neih te chu power point presentation hmangin a entir a, chak zawka hmalak a nih theihnan harsatna hrang hrang an tawh te sutkian pui turin CS hi a ngen bawk ani. Hemi bakah hian District official-te in an hmalakna tlangpui te sawifiahin an hnathawh kawnga harsatna an tawh te Chief Secretary hnenah hian an lo thlen ve bawk a, hnathawktu indaih lohna avanga harsatna an tawh te an tarlang a, Khawtlang hruaitute te pawhin Kolasib leh Kawnpui inkara Sunshine Company te ina Kawngpui an enkawl thatloh avanga mipuiin harsatna an tawh thu an tarlang a, hemi chungchangah hian hmalak pui tura ngenin CS chuan District Bawrhsap kaihhruaina hnuaiah hmalak thuai a nih tur thu a sawi ve bawk ani.

Inkawmhona neih zawh ah hian CS chuan Venglai a Sports Stadium sak mek, Dihmun zawla Bawlhhlawh sawngbawlna hmun  (Solid Waste Management) leh Kolasib District Hospital te a tlawh a, heng hmunah hian a changtu officer ten Chief Secretary chu lo dawngsawngin hna kal mek dinhmun leh hmachhawpte an sawiho. Sawrkarin hmasawnna ruhrel leh mipui mamawh thil hrang hrang a siamte chu duat tak leh neitu rilru pu chunga mipuiten an enkawl a tul thu a sawilang a ni.