Vawiin khan Mizoram State Museum, Art & Culture Department chuan International Museum Day pualin chanchinbu mite, School 3 leh Pachhunga University-te sawmin hun an hmang a. Kumtinin khawvel pumhuapin thupui hrang hrang neih thin a ni a, kumina International Museum Day thupui hi "Hyperconnected museums, new approaches, new publics" tih a ni.

 Mizoram State Museum hian 2017-2018 kum chhung khan tlawhtu mi 9130 an nei a, heng zinga mi 24 hi VIP an ni a, foreigner visitors mi 10 an nei bawk. Mizoram State Museum-ah hian Gallery 6 (paruk) a awm a, Mizoram State Museum hian Museum objects 3757 lai a la khawm tawh a, heng zinga 768 te hi show case chi hrang hrang 107-ah pho chhuah a ni a. A bak zawng hi reserve collection-ah dah a ni. India hmun hrang hrang Tribal Museum, Ranchi, Bhopal Museum, Silpigram Museum, Guwahati-ah Museum Objects eng emaw zat thawn (Donate) an ni tawh bawk a. April 2018 chhung khan Jawaharlal Nehru State Museum, Itangar, Arunachal Pradesh-a phochhuah turin Mizo hnam ziarang tarlang thei tur Museums Objects 74 lai an dah bawk a. Tunah hian New Secretariate Complex-a Museum Extension Building sak mekah Dio-rama of Natural History, Dio-rama of Cultural Anthropology, Dio-­rama of Water animals etc.  kalpuina turin hma an la mek a. Museum building thar hi Museum of National Character ni tura ruahman a ni, hemi atan hian North East State hrang hrang atangin Museum Objects lakkhawm nual an ni tawh a ni.

 Entry fee hi puitling pakhat tan Rs.20 leh naupang pakhat tan Rs.10 a ni a. School naupang zirtirtute hruaia educational trip-a lo kalte chu 50 % concession pek an ni a. Kum 65 chin chung lam te chu en man chawitir an ni lo bawk. Tin, ram pawn atanga lo kal foreign visitor-te en man atan Rs. 50 lak a ni. Museum-a camera (still leh Video) ken luh man hi siam thar a ni a, Mobile Camera & Ordinary Camera - Rs. 20 ; Digital & Movies Camera - Rs. 100; Video Camera - Rs. 250; Documentary Film - Rs. 1000. Museum hi March - September thla inkar chhung zawng chu dar 10:00 AM - 4:00 PM -ah hawn thin a ni a, October - February chhung chu dar 10:00 AM - 3:30 PM-ah hawn a ni thung. Chawlhkar tin thawhtan ni apiang hian chawhma lamah thawktuten Gallery tihfaina hun an hmang thin a, chuvangin thawhtanni-ah chuan Dar 1:00 PM -ah Museum hi hawn thin a ni a. Inrinni hian dar 10:00 AM - 2:00 PM chhung Museum hawn thin a ni.

Vawiin hian International Museum Day lawmnan mipui tan Museum en man awm lovin an hawng a. Khawvel puma Museum hrang hrangten ni bik, mahni remchan ang theuha an hman turin International Council of Museum (ICOM)-in kum 1977 khan he ni hi International Museum Day atan a puang a ni.