Vawiin tlai khan PWD Minister Pu Lal Thanzara hovin a pisa-ah Pu Joesph Lalhimpuia, MLA, PWD CE (Roads) Pu Lalrintluanga leh Geology & Mineral Resources hotuten Aizawl leh Lunglei inkar kawng hmasawnna tur ngaihtuahin an thukhawm.

PWD Minister Pu Lal Thanzara chuan Tlawng leh Pukpui, Lunglei inkar kawng zirchianna chuan kawng siam thatna kawngah nasa takin a pui dawn a ni, a ti a. He hunah hian Geology & Mineral Resources hnathawkte leh PWD, Lunglei Circle ten April Ni 18-21, 2018 chhunga Tlawng leh Pukpui inkar kawng an zirchhianna Geological Assessment Report, Geology & Mineral Resources in an siam chu sawiho a ni a. Tlawng leh Pukpui inkar leilung rualremlo leh nghetlo vangin kawng a that tur angin a that loh phah a, fur laia tui tla nasa chuan leilung insawhnghet tur a timuang bawk a ni tih report chuan a tarlang a. Kawng hnuaia kawr tui paihna lungrem siam that ngai lai hmun te, tuihawk luankawr siam belh ngai te, Geogrid/GeoJute (kawnga bawlhhlawh/lei tla dang tu tur) pawimawhna leh hman thuai a nih tur chungchang sawiho a ni a. PWD E-in-C leh hotu dangte, Geology & Mineral Resources hotuten he meeting bawhzuina in hmalak dan tur sawihona an nei leh dawn a ni.

Kawng siam nan hian chak takin hma lak mek zel a ni a. Kanghmun ‘S’ leh Pukpui inkar kawng siamthat nan NEDP atangin cheng nuai 1000 hmuh tawh niin Haulawng leh Dawn inkar kawng siam that nan NEDP atangin cheng nuai 100 leh State Priority Project (SPP) atangin cheng nuai 20 hmuh a ni bawk a ni.