Vawiin khan Kolasib Bawrhsap Pu H. Lalengmawia, IAS hovin Kolasib District Urban Areas (Kolasib, Bairabi, Vairengte leh Kawnpui) a Cable TV Analogue signal atanga Digital signal a chuankai nana Cable TV Digitization chungchangah Cable TV Operator-te nen an hma lak tawh na chin an thlir ho a, an harsatna te an sawi bawk a ni.

DC Pu H. Lalengmawia chuan Cable TV Digitization ah hian state sawrkar in thuneihna a nei lova, Mizoram chauh nilo state dangte pawhin hemi chungchangah hian harsatna an nei leh an tawh ve a rin thusawiin an hma lak tawh chin leh an harsatna te sawi turin he meeting a tel Cable operator leh an aiawhte a sawm nghal a. Meeting ah hian Cable operator ten an hma lak tawhna chin te tarlangin, set top box duh anga a Company atanga supply a that loh avangin duh ang thala chakin Digitization a kalpui theih loh thu chu an sawi a ni.

Tun dinhmunah hian Kolasib khaw chhungah hian KCN in subscriber 3000 vel leh CZS in subcriber 2180 an nei a. KCN hian set top box 500 vel an sem chhuak tawhin adang 400 vel an chah thleng tep a. An control room pawh za zelah 60 vel an peihfel tawh a, hengte hi an peihfel chuan channel 250 bawr vel pek chhuah thei a ni ang. KCN hi LPS hnuaia sub-operator angin signal an la chawng dawn a ni. CZS in set top box 1000 bawr vel an semchhuak tawh a, Kolasib a set top box 400 vel semchhuakin a bak chu Vairengte leh Thingdawl ah te an pe a. Set top an chah belh mek a, a thlen hun nghakin an control room pawh an peihfel tawhkhat tawh niin an sawi.

Kawnpui a sub operator te hian LPS line Aizawl atanga lo chhuk chu an ring hlawm dawn a, set top box an duh ang company ten an pek theih loh vangin harsatna an tawh thu an sawi. Bairabi lamah chuan sub-operator pahnih te hian LPS leh Zonet an dawr mek niin an sawi. Thingdawl ah pawh hian set top box engemaw chu operator ten an vuah tawh niin an sawi. Vairengte a sub operator Apollo Vision chuan an subscriber 900 bawr vel atanga 280 vel chu set top box an vuah sak tawh niin an sawi a. Vairengtea operator dang RTP Vision chuan subscriber 250 bawr vel atangin set top box 45 vel an fit sak tawh niin an sawi. He hunah hian Phase III a tel ve lo Bilkhawthlir leh Buhchangphaia operator te pawhin an inhmakhuana an tarlang bawk a ni.

Meeting ah hian Addl. DC Pu R. Lalremsanga, SDC Pi Lalhruaitluangi leh Cable TV operator leh an aiawhte an tel a ni.