Vawiin khan Kolasib Bawrhsap Pu H. Lalengmawia, IAS hovin Kolasib District Urban Areas (Kolasib, Bairabi, Vairengte leh Kawnpui) a Cable TV Analogue signal atanga Digital signal a chuankai nana Cable TV Digitization kalpui mek chungchangah Cable TV Operator-te nen an hma lak tawh na chin an thlir ho a, an harsatna te an sawi bawk a ni.

DC Pu H. Lalengmawia chuan Cable TV Digitization-ah hian state sawrkar in thuneihna a nei lova, tunah analogue signal kaltlanga TV channel tlem te kan la en theih hi hriatthiamna vang chauh a ni a. Analogue signal la kal hram hi nakin lawkah a tawp thut dawn a, chuvangin mipui lam pawhin hei hi kan hriatthiam a Set Top Box(STB) nei vek tura hma kan lak theuh a ngai a ni a ti a. Kolasib District-a Phase III in a huam khua a cable operator zawng zawng STB vuah lamah chak taka hma la turin a hriattir nghal a. STB an fit chu kartin a report Nodal Officer(Addl. DC) hnenah ziaka thehlut turin a hrilh bawk a ni. Phase III in a huam loh zawng Phase IV a area te hi kumin December ni 31 ral hmaa Digitization kalpui tur a nih avangin heng area a cable TV operator te pawhin tun atanga hma an lak a tul thu a sawi lang bawk.

Kolasib ah hian CZS hi Multi Satellite Operator (MSO) license nei awmchhun niin an subscriber za zelah 44 vel chu STB an vuah sak tawh a. KCN hi LPS hnuaia Local Satellite Operator (LCO) niin an STB fit tawh zat chiah hriat theih a la ni lova. Bairabi a cable operator te pawhin hma an lak dan kimchang takin an report bawk a ni.

Mizoram pumah hian MSO pariat an awm mek a. Nimin khan hemi chungchangah state level meeting neihah Digitization lamah hian Kolasib District hi hma la tha pawl nia tarlan a ni.

Meeting-ah hian Addl. DC Pu R. Lalremsanga, SDC Pi Lalhruaitluangi leh Cable TV operator leh an aiawhte an tel a ni.