Khawvel puma hman rualin vawin chhun khan I&PR Auditorium ah Health & Family Welfare Department hnuaia RNTBC huaihawtin World T.B. Day hman a ni a, Health Minister Pu Lal Thanzara’n a hmanpui.

Khuallian Minister chuan thusawiin Health Department ten engemaw puala ni hrang hrang an hman thin hmangin hriselna kawnga an hriat tur pawimawh tak tak te mipui hnenah hrilhhriat an ni thin chu lawmawm a tih thu a tarlang a. ‘TB titawp turin i tangrual ang u’ tih thupui hmanga World TB Day an hman chuan rah tha a chhuah ngei a beisei thu a sawi. Minister chuan khawvel mihring hmun thuma thena hmunkhat vel TB hrik pai anga chhut an nih thu sawiin India ram chu khawvela TB vei tamna ber a nih thu te leh mi maktaduai 3 velin TB hrik pai anga chhut a nih thu te a sawi lang a. TB tihdam harsa bik (benvawn) Multi Drug Resistant TB pawh India chu a vei tamna ber a nih thu a tarlang bawk. Mizoram ah TB vei kan tam thu te sawiin Pu Lal Thanzara chuan nikum 2015 khan TB vei rinhlelh mi 9658 endik zingah mi 2088 te chu veia hmuhchhuah an ni a, khaka hrik awm chi bik chu 518 a nih thu te, TB vanga thi 38 an awm thu leh khaka TB hrik hmuh zingah 84% chu enkawl dam an nih thu te a tarlang bawk. Multi Drug Resistant TB hmuhchhuahna khawl CB-NAAT pawh Aizawl District-a awmsa bakah Lunglei leh Champhai District ah hman mai theih turin khawl thar bun fel a nih tawh thu a puang a. Vawiin thlenga mi 1192 test tawh zingah mi 178 te chuan Multi Drug Resistant TB an vei tih hmuhchhuah a nih thu a sawi lang bawk. HIV vei ten TB an vei awl bik avangin chumi kawngah MSACS nen tha taka thawhho a nih dan te a sawifiah bawk. Private Hospital leh private Doctor ten TB an hmuhchhuah leh enkawl apiang te chu sawrkar ah inhriattir zel turin a chah bawk. Natna tihdam theih, ngaihthaha hlauhawm tak ni si TB chu umbo a nih theih nan Zoram mipui te tangruala tan la thar theuh turin a sawm bawk a ni.

Pu Lalrinliana Fanai, IAS, Commissioner & Secretary, Health & Family Welfare pawhin thusawiin kum tin TB vei 2000 vel hmuhchhuah thar an nih thin thu te, TB ven dan tha ber chu a vei te rang taka enlawkna pek a nih thu te tarlangin mipui ten TB venna kawnga hmalakna te tha taka an thlawp a pawimawh thu te a sawifiah bawk.

World TB Day hmanna ah hian Dr Vanlalfela, State TB Officer chuan TB venna leh enkawlna kawnga an hmalak dan te a sawifiah a, TB hmuhchhuah leh enkawlna kawnga hma la tha hospital leh mimal thawk tha te hnenah Director of Health Services Dr Rohmingthanga Ralte chuan chawimawina Certificate a hlan a, H&FW Principal Director Dr K.Ropari’n lawmthu sawina hun a hmang bawk a ni.