Vawiin khan Kolasib DC Office-ah kum 2015-2016 September quarter atan District Consultative Committee/ District Level Review Committee/ District Level Security Committee (DCC/DLRC/DLSC) meeting neih a ni a. He meeting hi Kolasib DC Pu H. Lalengmawia IAS chuan a kaihruai a, SP Pu C Lalzahngoa, RBI, SBI leh NABARD aiawhte leh Kolasib District chhunga Bank hrang hranga Branch Manager-te leh Sorkar Office hotu thenkhat te an tel a. Potential Linked Credit Plan, 2016-2017 Kolasib District tan a NABARD buatsaih chu tlangzarh nghal a ni.

Kolasib DC Pu H. Lalengmawia chuan mipui rawngbawltu vek kan ni tih hriain loan pek kawngah mi harsa zawkte ngaihpawimawh nachang hre tlang turin Bank Manager-te chu sawmin, District Administration leh a kaihhnawih department-te nen a theihna apianga inpuihtawn a pawimawh thu a sawi a. Thawhhona tha neia, hma kan lak ho chuan mipui rawngbawlna kawngah hma kan sawn dawn a, a chhawrtu ber chu mipui an ni a, chu chu kan thawh chhan theuh pawh a ni, a ti bawk.

Bank aiawh kalkhawmte chu data rintlak leh dik a pawimawh avangin hengte lak leh tarlan kawnga a dik thei ang ber tarlang thin turin a chah a. Mipui lampangah pawh zirtir ngai tam tak kan la awm a ni a ti a, an hriatloh vangin mi tam tak chuan Sorkar approve sa scheme-ah pawisa dah nachang hrelovin, chiahpuam himlo tak taka dah zawkte an awm thin chu inhrilhhriat kan la ngaih nasat zia tilang tu a ni tiin Chairman chuan Financial Literacy Campaign pawh kalpui ngawrh lehzual turin a chah a ni.

Meeting-ah hian tunlaiah bank account details number, ATM PIN number leh thil dang dangte zawta mi bum hmang an awm chu ngaihpawimawhawm tiin hemi chungchangah hian fimkhur tura mipuite hrilhhriat thar ni se tih a ni a. Bank chuan phone-in emaw e-mail hmang pawh in tumah an account details an zawh ngailoh bakah, online shopping ti tan pawh fimkhur a pawimawh thu tarlan a ni.

RBI aiawh Pu C Sangpu Vaiphei chuan RBI in Aizawlah Office an neih tak avangin ngawrh leh zawka Bank te hnathawh leh mipui rawng an bawlna kawnga hma an lak dan te an thlithlai dawn a ni, a ti a. Financial Inclusion leh banking chungchanga mipui te hnenah hrilhhriatna a tam thei ang ber an ti dawn a ni, a ti bawk a. January thla khian Town Hall meeting neih an tum thu a sawi bawk.

Meeting ah hian meeting hmasa a minute te pawm a ni a, Annual Credit Plan chhungchangte, PMGEP leh sawrkar bultum scheme dang chungchangte, Financial Inclusion chungchangte leh Financial Literacy Camp chungchangte sawiho a ni.