98/2026-2027

Kolasib, April 9, 2026: Vawiin khan Kolasib DC Video Conference Room-ah Kolasib District Sports Committee chu an Chairman leh Kolasib DC ni bawk, Pu H. Dolianbuaia hovin an thukhawm a. Kolasib District-a infiamna (sports) hmasawn zelna atana hmalakna tur chi hrang hrangte an sawiho.

He thutkhawmnaah hian DC Pu H. Dolianbuaia chuan thu sawiin, infiamna chu amah ngei pawhin a tuizawng tak a nih bakah, hun kal tawhah Joint Secretary hna te pawh lo chelh tawh thin a nih avangin sports tihhmasawnna tur atan theihtawp a ngaihtuahna te a lo sen ve thin thu a sawi a. Kolasib District ah pawh Sports hmasawn nan kalphung pangngai bakah a lian tham zawka hmalakna tur ngaihtuah turin kalkhawmte chu a chah a ni. DC chuan sports leh eco-tourism kaihkawp a hmalak dan tur ruahmanna siam thiam a pawimawh hle tih a sawi bawk.

Vawiin thutkhawmnaah hian agenda pali ngaihtuah ho a ni a. Chungte chu - Mizoram State Sports Council (MSSC) atanga Promotional Fund an dawn thin sem zai dan turte, Affiliation chungchangte, District Sports Committee inkaihhruaina ennawn chungchang leh Blood Donation neih chungchangte a ni.

MSSC atanga Promotional Fund, Rs. 1,75,000/- (Nuai khat, sing sarih leh sang nga) dawn chu kalkhawmten an remtih tlan danin Association hrang hrangah sem zai a ni a. Affiliation pawh kumin May thla chhunga tih nise, Affiliation fee atan Rs. 500/- nise tiin an pawm tlang a ni. Hei bakah hian inkaihhruaina dan pawh hmasawn zelna tur leh felfai zawka kalpui a nih theih nan a tul laite siamthat a ni bawk.

Vawiina District Sports Committee thutkhawmnaah hian Kolasib district chhunga Sports Discipline hrang hrang hruaitute leh an aiawhte an kalkhawm a ni.