97/2026-2027

Lawngtlai, 9th April 2026: Vawiin khan Lawngtlai District Water & Sanitation Mission (DWSM) chuan DC Conference Hall-ah thutkhawm an nei a. Pu Donny Lalruatsanga, Chairam leh District bawrhsap nibawk chuan a kaihruai.

Pu Donny Lalruatsanga chuan kalkhawmte hnena lawmthu sawina a nei hmasa a. Swachh Bharat Mission (Gramin) leh Jal Jeevan Mission- kaltlangin hmalakna tam tak awm mah se, a enkawl zui lamah theihtawp chhuah a tul thu a tarlang a.Neitu thinlung put a pawimawh tak zet tih sawiin, a bik takin vantlang mipuite tana siam- Water Tanky, Solar pump, Community Sanitary Complex, Compost pit, Soak pit leh Plastic Collection Centre- te enkawl leh vawnfai kawngah mipuiten hmasawn a tul hle a ni, a ti.

Bawrhsap chuan March ni 22, 2026 ah tha tak a ' World Water Day' hman a ni chu lawmawm a tih thu a sawi a. Tui hna siam turin ramngaw humhalh a pawimawh hle tih tarlangin, a humhalh kawngah theihtawp chhuah a tul hle a ti a. Renchem taka tui hman chu tihmakmawh tak a ni tiin, tui hman kawngah mipuite inrenchem zawnga khawsak thiam turin a chah a. Lawngtlai District mipuite mamawh ang tui thianghlim pek chu thil tul leh pawimawh tak a ni tiin, Pu Donny Lalruatsanga chuan theihtawp chhuah chhunzawm a nih tur thu sawiin, a bik takin PHED- te tha thlah lo turin a chah nghal bawk.

Er. Lalnunfela, EE, PHE leh Member Secretary - nibawk chuan DWSM hnuaia hmalak tawhna tlangpui sawizauna a nei a.JJM hnuaiah ' Jal Arpan Diwas' chu Sihtlangpuiah neih niin, Functional Household Tap Connection ( FHTC) chu In - 167 ah dahfel tawh a ni, a ti a . Jal Arpan Diwas - hi Tuikhurlui khuaah neih nibawkin, heng khuaah te hian tui lakna hmanrua leh bungruate chu 'WATSAN Committee' hnenah hlan nghal an ni a ti.

Thutkhawmah hian DWSM hmalak dan tur sawiho nghal a ni a. Jal Mahotsav Pakhwada Programme (Kar hnih chhung awh Tui Kût) tha taka hman a ni chu lawmawm an ti tlang a. Tui hna tha zawk siam tura hmalak chu tha ti tlangin, PHED leh EFCC Department - ten thawhhona tha zawk lo nei se an ti a. JJM tha taka kalpui a ni thei chu lawmawm tiin, JJM 2.O- ah thawm that ngai leh hmalak ngaihna awm ang angte uluk leh tha taka kalpui ni se an ti a ni.

Vawiin thutkhawmah hian Lawngtlai District Water & Sanitation Mission (DWSM) Member- te an tel kim tha hle a, Pu Donny Lalruatsanga chuan lawmthu sawina neiin thutkhawm a khar.