Vawiin khan Kolasib District Dy. Commissioner Pi Niharika Rai IAS hovin DC Office Chamber-ah Kolasib Town Road Development Coordination Committee an thukhawm a. Mizoram sorkar Urban Development & Poverty Alleviation Department hnuaia NBCC Contractor ten Kolasib khawchhung kawng siam hna an thawh dan an sawi ho.

UD & PA hnuaia Kolasib khawpui chhung kawng siam hna thawh nan hian Rs. 2,459.88 lakh ruahman a ni a. Kawng siam tur chu 34.62 kms a ni. Kawng siam tan hun June 9, 2008 atanga thla 15 chhunga thawh zawh hman tura ruahman a ni nain thla 25 chuang a ral hnu vawiin ni thlengin hna hi thawh zawh a la ni lo va. Chhan eng eng emaw avanga hnathawh muang lutuka hriain PRISM Kolasib Branch te chuan tun hnai khan DC hnenah hian hmala turin an ngen a, DC chuan meeting hi a ko nghal a ni.

Pi Niharika Rai chuan chak zawka kawng siam hna thawh anih theih nan thla hnih leh a chanve a ral apianga Kolasib Town Road Coor. Committee chu thutkhawm thin nise a ti a. Chutih chhungin NBCC in Urban Development ah hmalakna report a pe thin ang a, chu report chu District Urban Development Officer in DC ah a thlen thin dawn a ni.

Kolasib khawpui chhung kawng siam hna hi a inchiah rei tawh avangin a tira siam tur bituk 34.62 kms atanga 6.02 kms chu chawlhsan rih tura tih a ni ta bawk a ni.