Vawiin khan Fire &Emergency Services Headquarters, Huntharah Home Minister Pu R. Lalzirliana chuan Local Council leh Village Council bakah kohhran leh YMA Branch thenkhat aiawhte hnenah kangthelhna hmanrua Basic Fire Fighting Equipments man tlawm zawk (subsidy rate) a hralh chu a pe chhuak.Veng/khua pakhat tan 4.5kg Carbondioxide Extinguisher pakhat, ABC Stored Pressure Type pahnih, DCP Extinguisher (Cartridge type) pahnih, Dry Powder (56kg packet) pahnih, Cartridge pahnih leh Fire Hook panga, a vaia Rs 13,600 man hu chu a man chanve (50% subsidy) in pek an ni a. ABC Stored Pressure Type engemawzat chu tunah hian 25% subsidy a hralh chhuah turin puahchah mek a ni bawk a, Department in pakhat Rs 1,900 zel a a lei chu Rs 1,425 zelin hralh a ni ang. ABC Stored Pressure Type hi hman ruah a nih pawhin Aizawl a hetiang lam zuartute hnenah a thun (re-fill) theih zel a ni. Lunglei, Saiha, Lawngtlai, Champhai, Kolasib, Serchhip, Tlabung leh Aizawl Fire Station a hman tur Combination tool leh TV, Home Minister hian a sem nghal bawk.

Home Minister chuan Fire &Emergency Services Department-ten ruahmanna tha tak siam a kangthelhna hmanrua man tlawm zawka Local Council, Village Council, YMA leh kohhran hnena hralh a ni chu lawmawm a tih thu a sawi a. Veng leh khua in harsatna an tawh changa mawhphurtu ber leh khawtlang enkawltu an nih avangin an ni hnenah hian sem hmasak a ni a, mimal hnenah pawh kangthelhna hmanrua hi man tlawm zawka hralh tum a ni, a ti . Minister chuan Fire Department a thawktute chu mipui rawngbawltu, chawl hahdam mai mai lova inring renga awm ngai, hna hautak tak thawktu an ni, a ti a. Kangmei a chhuah palh a rang taka thlen theihna tur Fire Station hmun an mamawhna hriatpuiin ITI Veng leh Transport Department ten ram tha tak an pek avangin lawmthu a sawi a. Duh anga hmun laili leh tha an neihloh avangte, kawng leh traffic in a zir loh avanga kangthelhtuten harsatna an tawh thin te hriatpuia, a chhe lama insawiselna ringawt nilo, Department pawhin hma an sawn theihna tur thil tangkai sawi thin zawk turin mipuite a ngen a ni.

Fire &Emergency Services Department hi September 1, 1972 khan Fire Brigade hmingpu in an ding tan a. Tunah hian Director enkawlna hnuaiah thawktu mi 224 an awm a, training a kal engemawzat an awm avangin tunah hian mi 178 an thawk mek a ni. Kangmei laka him nan vantlang mipui zinga awareness nasa zawka pek a ngaihzia hriain F &ES Department chuan hma a la a. Chung zingah chuan kangmei laka fimkhur tura inzirtirna Poster tar, pamphlet sem, concert buatsaih, advertisement, essay inziahsiak, film siam, school thenkhata Fire &Evacuation drill neih, milar te hmanga school, dawr, office leh vantlang hmun a mipui zirtirna pek, zawhna leh chhanna hun media hrang hrang leh Doordarshan kaltlanga buatsaih te a tel a ni. Department in thahnemngai taka hma a lakna avang hian Fire Call dawn zat nasa takin a tlahniam a. April, 2009- March, 2010 chhunga Fire Call dawn zat 206 chu April, 2010 - March, 2011 ah chuan 52.42% a tlahniamin Fire Call 98 an dawng a. Fire season, January -April, 2010 a Fire Call dawn zat 176 a nih laiin kumin Fire season, January-April, 2011 khan 105 ah a tlathla a, nikum nena chhutin a tlakhniamna zat hi 40.34% a ni. Nikum chhung, January-April a kangmei avanga nun chan zat mi 5 an ni a, kumin January-April chhung hian kangmei vanga thi zat record chu mi 2 an ni a, tlakhniamna hi 60% a ni.

Fire Services tih changtlun nan kawng hrang hrangin hmalak a ni a. Fire Station Building thar Chaltlang, ITI veng, Khatla, Champhai, Mamit, Lunglei, Kolasib, Serchhip leh Saitualah te sak a ni dawn a. Plan fund leh CSS fund atangte in Medium Fire tenders (Ashok Leyland- F/T type B) 6, Mini-tenders (TATA Ace) pahnih, LPK-truck 1 leh Fire Fighting Bike 2 lei a ni tawh bawk.

Home Minister hi Parliamentary Secretary Pu Lalrinmawia Ralte in a tawiawm a ni.