433/2026-2027

Kolasib, 8th May, 2026: Vawiin khan DC Office Chamber-ah Kolasib Deputy Commissioner Pu H. Dolianbuaia hovin Kolasib District chhunga lirthei chesual laka mipuite an him theih nan lirthei endik runpui (enforcement drive) kalpui dan tur sawiho a ni.

Thutkhawm kaihruaitu Kolasib DC chuan lirthei khalhtute leh mipuite an him theih nan theihtawp chhuah a ngaih thu a sawi a. Dan anga hmalakna kawngah tha thlah loh a pawimawh thu sawiin, a bikin rui chunga lirthei khalh leh kum tling lo lirthei khalh chu pawi thui tak thlentu a nih theih avangin theihtawpa khauh taka kalpui turin a chah a ni. Kolasib Superintendent of Police (SP) Pu Lalrinpuia Varte pawhin thu sawiin, mipuite him nan dan kengkawh kawngah khauh taka hmalak a tul thu a sawi ve bawk.

Vawiin thutkhawmna in a rel angin Kolasib District Road Safety Committee hmalakna kal zel angin kan District-a lirthei khalhtute leh mipui an him tlan theih nan Kolasib District chhung hmun hrang hrangah Enforcement Staff (Transport), Traffic Police leh Magistrate, Kolasib ten lirthei kaihhnawih dan bawhchhiatna leh danin a phut lirthei document hrang hrang fel lote an endik dawn a . He hunah hian exhaust (silencer) ri ring (company in a vuah sa ni lo) te, Driving License nei lo lirthei khalhte, Helmet khum lo a lirthei khalhte, Two Wheeler-a mi pahnih aia tam inphurhte leh kum tlinglo lirthei khalhte endik a ni bawk ang. Lirthei khalhtu leh neitu zawng zawngte tha taka dan zawma, lo inhmakhua turin mipuite ngen an ni.

Lirthei khalhtu dan bawhchhia te hremna (Penalty) tlangpui chu hetiang hi a ni:

Driving licence neilo (Section 181) - Rs. 5000

Helmet khum lova lirthei khalh (Section 194(D)) - Rs. 1000

Two wheeler a mi pahnih aia tam inphurh (Section 194(C)) - Rs. 1000

Kum tlinglo lirthei khalh (Section 199(A)) - Rs. 25000

Rui chunga lirthei khalh (Section 185) - Rs. 10000