434/2026-2027

Lawngtlai, the 8th May, 2016 : Vawiin chawhnu dar 1:00 PM khan Deputy Commissioner, Lawngtlai Office Chamber- ah Bawrhsap Pu Donny Lalruatsanga hovin Stand Up Lawngtlai (Tho Law Dir Tuah) hnuaia 'Traffice Enforcement Task Force' leh 'Clean Lawngtlai Committee' thutkhawm neih a ni.

Bawrhsap Pu Donny Lalruatsanga chuan kalkhawmte hnenah lawmthu a sawi a. Lawngtlai khawpuiin kawng hrang hranga hmelthar hmua, hmasawnna tha zawk a neih theih nana chak taka hmalak mek a nih thu a sawi a. A bik takin ' Stand up Lawngtlai (Tho Law Dir Tuah) hnuaiah District Administration leh LADC- ten thawhhona tha tak nei tih tarlangin, heihian rah tha a chhuah ngei ang a ti. Khawpui fai, thawl nuam leh chhenfakawm zawk siam turin 'Traffice Enforcement Task Force' leh 'Clean Lawngtlai Committee' ten theihtawp an chhuah mek tih tarlangin, mipuite pawh lo tawiawm tlat turin a sawm nghal bawk.

Pu K.Lalthanzara, Executive Secretary, LADC chuan Stand Up Lawngtlai (Tho Law Dir Tuah) kalpui mekah a taka hlawkna hmuh mek a ni, a ti a. Lawngtlai khawpui hmasawnna tura atana hmalakna hrang hrangah, LADC chuan a tih theih chin chinah theihtawp a chhuahzel tur thu a sawi a ni.

Pu HC Vanlalruatpuia, Transport Officer, LADC chuan Lirthei dah dan felfai zawk a awmtheih nan LADC chuan ruahmanna siama, thupek a tichhuah tawh thu a sawi a. Tun dinhmunah zankhuaa kawngkama Lirthei dahte chu 'Village Level Traffic Management Committee' hmalaknaa ' Parking Fee' khawn tawh niin, 'Parking leh No Parking' pawh mumal takin tihfel a nih tawh thu a tarlang a ni. Pu C.Lawmsangzuala, Sanitation Officer, LADC chuan khawpui cheimawi tura hmalakna hrang hrang sawizuana a nei a. Tun dinhmunah kawng intawhkhawmna (Junction) chei mek a nih thu tarlangin, Zero Waste Corner - pawh buaipui mek a nih thu a sawi.

Thutkhawmah hian Member- te an telkim tha hle a, Bawrhsap chuan lawmthu sawiin thutkhawm hi a khar a ni.