No.3458/2019-2020

Vawiin chawhnu khan DC Conference Hall, Kolasibah Zonal Executive Magistrate leh Essential Commodities Team ten Kolasib district chhung a Ration Card neilo chhungkua ten an mamawh ang eitur an dawn ve theihna ruahmanna siamin thutkhawmna an nei a, he hun hi Dr H Lalthlangliana, DC Kolasibin a kaihruai a ni.

Dr H Lalthlangliana chuan Zonal Executive Magistrate te chu an mahni bial chan theuh te chhung a mipuite harsatna chinfel kawngah a rang thei ang ber a hma la zel turin a chah a. Ration card neilo chhungkua te mamawh ang te pawh chhinchhiahna felfai tak nen Kolasib District Essential Commodities Team te hnen ah thlen turin leh Essential Commodities Team te kaltlangin eitur mamawh awm ang angte chu rualkhai tak a sem a nih tur thu a sawi. DC chuan, Ration Card neilo te zing a khawsak harsa ngawih ngawih, an awmna khawtlang hruaitute pawhin a an harsatna an hriatpui ngei te chu ngaih pawimawh hmasak tur an nih thu a sawi. 

Kolasib DC chuan, Covid-19 vang a lockdown chhung hian dan leh thupek kenkawh kawng ah District leh Village level Task Force te thawh hona a pawimawh thu a sawi a, Silai leh Airgun eng chi pawh khap vek a nih thu thutkhawmnaah hian a sawi lang bawk a ni.

Pu Vanlalfaka Ralte, SP Kolasib chuan mipui nitin mamawh, Essential Commodities phurtu motor (Public Carriers) zawng zawng te chu rang tak a, kawng lak a tihkhawtlai awm miah lo a kal tir zel tur a nih thu a sawi a. Task Force hrang hrang te pawhin heng motor te hi awlsam zawk a mipui mamawh an phur zung zung theihna turin a tul apiang a lo puih thin nise a duh thu a sawi bawk a ni.  

Kolasib district Zonal Executive Magistrate te hnenah hian Ration card neilo chhungkua te hi chhinchhiah mek a ni a, Task Force te kaltlangin heng chhungkaw zing a khawsak harsa zual te finfiah a, an mamawh eitur te hi ruahman sak an ni dawn a ni.