Tunlaia Novel Coronavirus (COVID-19) hri leng mek chungchang leh hemi avanga inkharkhip kalpui meka District mipuite tana ruahmanna siam te sawiho turin vawiin tlai khan Lunglei DC Conference Hall-ah Lunglei HPC Vice Chairman Pu Lawmawma Tochhawng hovin District Task Force on Covid-19 meeting neih a ni. Meeting-ah hian Lunglei South bialtu MLA Dr K.Pachhunga, SP Pu C.Lalthanmawia, Additional DC Pu R. Vanrengpuia, CMO Dr Thani Pachuau leh sawrkar official dangte, tlawmngai pawl aiawhte leh MJA hruaitute an tel.

HPC Vice Chairman chuan Lunglei District huam chhunga Village Level Task Force-te thahnemngaihna leh tlawmngaihna chu ropui a tih thu sawiin chhun zan zawma duty a, mipuite mamawh an buaipui sak avangin an chungah lawmthu a sawi a. Mipuite pawh sawrkar thuchhuak te ngai pawimawha, he natna hlauhawm leh inkaichhawn awlsam tak laka kan him tlan theihna turin inkharkhip chhunga chhuak vak lui lo turin a chah a. Taksa hriselna bakah rilru hriselna kan ngai pawimawh theuh tur a ni tiin mipuite chu an hun awl hmang tangkai tur leh ei leh in uluk turin a chah a ni. 

He hunah hian Lunglei South bialtu MLA Dr. K. Pachhunga pawhin VLTF-te hnathawh ropui a tih thu sawiin Mizo society ah tanrualna tha tak kan nei hi kan vannei takzet a ni, a ti a. VLTF-te leh Sawrkar Department-te pawh thawhhona tha tak an nei chu lawmawm a tih thu a tarlang. Mizoramin Coronavirus Testing laboratory kan neih thuai theihna tura hmalatu Core Committee ah a tel thu sawiin sawrkarin chak takin hma a la mek a ni, a ti bawk. 

He hunah hian Department hrang hrang atangin report ngaihthlak a ni a. Tun dinhmunah Lunglei District ah inkhunghrang mek mi 564 an awm a. Hengte zinga mi 551 hi mahni ina inkhunghrang (Home Quarantine) niin mi 13 chu sawrkar ina hmun a ruahman Facility Quarantine ah an awm mek a ni. Tin, tun dinhmunah Lunglei District-ah mi 57-in Quarantine Period tluang takin an zo fel tawh a, insawiselna an neih loh avangin Quarantine atangin thlah zalen (release) tawh an ni.

COVID-19 vanga inkharkhip laia Lunglei District chhunga mipuite'n ei leh bar leh an ni tin mamawh an tlakchham loh nana ruahmanna siamtu District Supply Chain Committee Member Secretary Lunglei DHO Pu L.Lalhmingmawia Pachuau pawhin report pe in Tuipui D, Thawizawl, Tlawng, Zawlpui leh Tuisenchhuah atangin thlai chi hrang hrang 20 chuang Lunglei khawpui leh a chhehvela sem chhuah turin lakkhawm mek zel anih thu a tarlang a. Lunglei khawpui chhungah chawlhkar khat chhungin vawihnih (ni hnih) -  Thawhlehni (Tuesday) leh Inrinni (Saturday)-ah te thlai lakluh leh zawrhna hun siam mek a ni. Zikhlum quintal 134, Tomato quintal 26, Antam tel 10,600, bawkbawn quintal 79 leh thlai chi hrang hrang lakluha semchhuah tawh niin thlai tharah Lunglei District dinhmun a tha tawk hle tih a tarlang bawk.

COVID-19 vanga inkharkhip hi Lunglei District chhunga khaw hrang hrangte'n an zawm tha hle a. Village level task force-te'n mahni veng theuh tha taka vilin, he inkharkhip vanga mipuiin harsatna an tawh loh nan theih tawp an chhuah a. Tun thleng chuan harsatna thleng hriat a la ni lo.