Vawiin khan District Level Standing Committee on Village Council Election chu Kolasib DC leh District Election Officer ni bawk Pu Jitender Yadav, IAS hovin DC Conference Hall-ah April ni 30 a Village Council Inthlanna lo awm tur atana Kolasib District inpuahchahna leh Inthlanna atana ruahmanna siam lailawkte thlir hovin hemi chungchang hi zau takin an sawiho a ni.

Pu Jitender Yadav chuan he Inthlanna atana nidanga tih ngai loh thil thar awmte chu hriatchian a mipui te hnenah hrilhhriat a pawimawh thu te sawiin inthlanna fel fai leh muanawm neih anih theih nan inthlanna buaipuitu te, Political Party aiawh te, NGO te, media te leh mipui tawiawmna a ngen a ni.

Addl D.C. Pu Lalfela Sailo leh Election Officer Pu R. Lalnghakliana te pawhin meeting-ah hian State Election Commission-in V/C Inthlanna atana hriattirna a chhuah te sawifiahna hun neiin a hriatzauna te pawh an sawi bawk. Anni hian Member atanga zawhna awmte chu chhangin hriatchian loh thil chu SEC lam an rawn tur thu an sawi bawk a ni.

Kolasib District-ah hian Village Council 52 awmin, seat 256 awmah 65 chu hmeichhe tan hauh a ni a. Kolasib District-ah hian chhungkaw 16,199 atangin vote nei mi 50,873 (mipa 24,923 leh hmeichhia 25950) an awm a. Polling Station 52, Polling Booth 64 leh Polling (voting) Compartment 96 ruahman a ni bawk.

Kolasib District atana V/C Inthlanna a Election Observer ni turin Pu C. Lalhmachhuana, ITS, Secretary, ICT Department chu ruat a ni a, Kolasib a inpuahchahna te en turin April ni 16 leh ni 17 te khian Kolasib tlawh tura beisei a ni.

Vawiin meeting-ah hian Kolasib SP Pu RP Meena; District Administration-a officer te; MUP; MHIP leh MPF aiawhte bakah chanchinbumite pawh an tel a ni.

Vawiin vek khan Kolasib DC; Kolasib SP Pu RP Meena, IPS leh Election Officer Pu Lalnghakliana te chuan V/C Inthlanna atana venhimna chungchang an sawiho bawk a. Kolasib ah hian Hyper Sensitive Polling Station 6 leh Sensitive Polling Station 5 a awm a, hengah te hian venhimna kalpui dan tur chungchangte sawiin an mamawh leh tul dangte chu SEC a thlen an tum.

Tarlan tawh angin tun V/C inthlanah hian in 200 chin hnuai lamah V/C member 3-ah hmeichhia 1, in 201 atanga 500-ah V/C member mipa 5-ah hmeichhia 1, in 501 atanga 1000-ah V/C member 7-ah hmeichhia 2, in 1001 aia tamah V/C member 9-ah hmeichhia 3 awm turin seat hauh a ni a. Hmeichhe tana seat zuah bakah seat dang an chuh phalsak an ni bawk a. Village Council term kum thum ni thin kha term 5-ah pawh sei a ni bawk.