India President Pu Pranab Mukherjee in Mizoram University Convocation vawi 10-na vawiin khan MZU Campus Multipurpose Hall-ah, Mizoram University Visitor anih angin a hmanpui a. MZU Vice Chancellor, Mizoram Governor, MZU Chief Rector ni bawk leh Chief Minister ten an hmanpui bawk.

President Pu Pranab Mukherjee chuan Mizoram University Convocation a a rawn tel thei chu India President anih hnua Mizoram a rawn tlawh theihna hun tha tak a nih bawk avangin lawmthu a sawi a. Mizoram chu khuanu siam thil mawi leh hlu tak tak awmna a ni tiin, Mizoram University Campus phei chu a chhehvel boruak leh a ram leilung chu zirna hmun atana duhthusam a ni a ti a. President chuan Mizoram UT anih kum leh state puitlinga hlankai anih kum te sawi langin, international border thui tak Myanmar leh Bangladesh ram te nen an inri avanga hmun pawimawh taka awm a ni a ti a. Mizote chu hnam inpawh tak, inthliarna awmlo a ni tiin, an khualchhawn dan fakawmzia te chu kan hre tlang vek a ni a ti.

President chuan zir chhuak tate chu mi hmantlak leh tangkaia awm chho zel tura fuihin, khawtlang tana in thiamna hman hi in mawh a ni a ti a. Lehkha lama hnufum deuh zawkte kaihruaitu tur an ni tih hre reng turin a chah a. India hi kawng hrang hrangah chak taka hmasawn reng a ni tiin, Mizoram thalaite tan hun tha a inhawng reng a ni a ti a. Chuvangin India thalai rual zawng zawngte nen kan ram tan in thawh tlan ka duhpui che u a ni a ti.Tlem lai deuh a Delhi a hmarchhak mite chunga hleihlenna awm te pawh tireh turin chak taka hmalak a ni a ti a. India rama hnam tam tak chengte inunauna tha hi tuma tihchhiat kan phal tur a nilo President chuan a ti.

Pu Pranab Mukherjee chuan education hian hriatna tih zau leh nungchang tha siam hi a tum ber a ni tiin, a bikin zirna sang zawk hian ram ropui min thlen thei a ni a ti a. Zirna in sang zawk te hi kan neih belh hle na in, khawvela zirna in sang tha zual 200 thlan chhuahah kan tel ve phalo hi kan inenchian a tul hle a ni a ti a. Mithiam tam tak zirchhuakte hi ramdangah zirna sang zawk umin an chhuak zel a, hengte hi enfel a tul hle a ni a ti. Zirna in sang zawk siam that anih theihna turin Central University Vice Chancellor Conference Rashtrapati Bhavan- ah neih thin a nih thu sawiin, Pu Pranab chuan Central University te hi India zirna in sang zawk te tidanglam dawrh thei khawpa sulsutu tur an ni a ti. Kum 2014 ah Mizoram University chu NAAC in ‘A’grade a pe chu a lawmpui thu a sawi a. University te hian zirna in dang te nen kawng hrang hrangah National Knowledge Network kaltlangin inkungkaihna siam a tul a ni a ti.

Zirna in sang te hi khawtlang entawn an ni tur a ni a tiin, President chuan central sorkarin ‘Swachh Bharat Mission’ te, ‘Digital India ‘ programme te leh Sansaad Adarsh Gram Yojana te a kalpui thu a sawi a. Zirlaite tana tangkai tur Massive Open Online Courses leh Choice-Based Credit System te khawvelin a hmelhriat tana, hengte hi University chuan lo bengkhawn a tha hle a ni a ti.

Mizoram Governor Pu Keshari Nath Tripathi pawhin thusawiin, convocation hi zirlaite tan hun pawimawh leh hriatreng tlak a ni a ti a. Zirchhuak te chu lawmpuiin an kal zelna turah duhsakna a hlan a ni.

Chief Minister Pu Lal Thanhawla chuan Mizoram University Convocation vawi 10-naa President Pu Pranab Mukherjee an a rawn telpui chu lawmthu a sawi a, education leh kan ram tana a inpekzia tilangtu a ni a ti a. Mizoram University atanga zirchhuak te leh an chhungte chu a lawmpui thu sawiin, an thawhrimna leh inpekna avangin chhuan lokal leh zel tur te tan hotu tur tha tak kan nei thar a ni a ti a. Mizoram chu ziak leh chhiara kan sanna hi hman tangkaipui thiam ila, ei leh bar kawnga kan hnathawhna tichaktu ni thei se a duhawm hle a ni a ti a. Kan khawtlang hian thalai talent nei tha te chhawr theiha an awmna turin zirna sang zawk kan buatsaih zel a pawimawh a ni a ti. Hemi atan hian University hian a research programme te a zauh zel a ngai a ni a ti.

Chief Minister chuan hun lokal zel turah zirna in tha tak tak ala piang chho zel ang tih a beisei thu a sawi a. Chutiang hunah chuan MZU hi hmasawnna thar hmuh chhuahna hmunpui, khawvela university chungchuang tak takte nena intlawh tawnin, finna leh thiamna sang zawk umin zirtirtu leh zirlaite inkalpawhna ala ni ngei ang tih a beiseiawm a ni a ti.

Zirchhuak te chu an mawhphurhna hre reng chungin an thiamna te chu ram leh hnam hmasawnna atan hmang turin a chah a ni.

Prof. R.Lalthantluanga, Vice Chancellor, MZU chuan kalkhawmte lawmna thu a sawiin, MZU chungchang tlangpui a tarlang bawk a ni.

Convocationah hian President Pu Pranab Mukherjee hian Gold Medallists 29 te hnenah medal a hlan a. Vice Chancellor in Ph.D Degree mi 31 hnenah a hlan bawk a. Hengte bakah hian M.Phil Degree mi 33 te hnenah, MA(139), M.Sc(82), Master Degree (Social Work) (12), M.Com(07), MBA (20), MJMC (09), M.Ed (12), M Lib & Info (10), MCA (18), BA Hon/Gen (02), BA (138), B.Sc Hon (03), B.Sc (42), B.Sc (Nursing/MLT) (24), B.Com (12), LLB (01), B.Tech (ECE/IT) (09), BCA (25) (total 629) leh dawngtu awmlo, absentia a degree mi 2841 te hnenah degree pek an ni bawk a ni.