Nimin dt.25.11.2015 khan Kolasib DC Pu H. Lalengmawia IAS chuan Bairabi a tlawh a, khawtlang leh tlawmngai pawl hruaitute te bakah Bairabi a sawrkar hnathawkte chuan amah hi Bairabi Hmar Veng YMA Hall ah lo hmuak a, an ni hovin vantlang inkhawm an nei nghal a ni.

Vantlang inkhawm ah hian Kolasib DC Pu H. Lalengmawia chuan retheihna hi hmasawnna daltu ni lovin hma sawn turah min nawrhtu leh min ti kaltu nia an ngaih thu te sawiin rilru leh ngaihtuahna kan chawisan a, kan tum a san chuan harsatna tam te paltlangin hlawhtlinna kan nei thei a ni, a ti a. Bairabi chu rel kawngin Mizoram a thlen chin la awmchhun leh ramri depa awm anih avangtein khaw pawimawh tak a ni a, mipui te chu kawng engkimah Mizoram leh Mizo te darthlalang mai nilovin Kristiante darthlalang an ni a tiin midang tan entawntlak ni turin a khaw mipuite a chah a ni.

Zirna chu hmasawnna bul anih dante sawiin DC chuan nu leh pa te kalkhawm te chu zirna ngaipawimawha an tu leh fate zirna atan tun aia nasa leh zawka ngaihtuahna, tha leh zung, sum leh pai seng thin turin a fuih a. Zangnadawmna sum an lak chu in leh lo sak leh nomsakna atan hman leh sen ai chuan an fate zirna atan an insen chu a finthlak zawk a, zirna hi sum peipunna hlawk ber a ni, a ti a. Zirna chu a ngaihpawimawh berte zing ami anih avangin Education Campaign neih a tum thu leh ziak leh chhiar la thiam loh te thiam tir an nih theih nan Department hrang hrang te tang tlanga Literacy Drive neih tum a nih thu te a tarlang bawk. Chhungkua inenkawlna leh inrelbawlna a that tawk loh avangin suahsualna hrang hrang a pung nia a hriat thusawiin hemi hi siamtha tur chuan nu leh pate an pawimawha, Mizoramin a mamawh ber chu nu tha a ni, a ti.

Vantlang inkhawm neih zawhah DC hian NH-154 kawng zauhna turah Bairabi khaw chhunga mimal ram laksak, zangnadawmna dawng tawh mahse an in leh lo la thiat lo te chu meeting a neihpui leh a. Meeting ah hian DC chuan Sawrkarin Eviction Notice June ni 25, 2015 a chhuah tawh anih angin Sawrkar thu zawm a, an in leh lo chu November thla chhunga thiat turin a hrilh a. PWD EE Pu Sanghrima Chongthu leh a thawhpui te nen a hmunah thil awm dan te enfiahin, in hrang hrang thiah chin turte an en bawk a ni.

Hemi hnu hian Pu H. Lalengmawia chuan Meidum a ONGC in oil leh gas zawn hna an thawh mek na Drill Site a tlawh a. ONGC aiawhte chuan DC hi lo dawngsawngin an hma lak tawh chin te an hrilh a. Tun dinhmunah hian a lei verh hna chu an zo fel tawh a, mahse test hrang hrang te an la ti mek vangin gas an hmuhchhuah awmzat leh a tam dan chiah an la sawi thei lo a ni, an ti a. DC chuan he Drill site an chhuahsan dawn nia thuthang awm a zawh chu ONGC lam chuan helai hmun hi a chep avangin an hmanraw lian tak tak, hna thawh zawh tawh ang chi chu hmun danga an thawnchhuak thin a, chu chu mi thenkhatin an lo ngaibel thei a ni tiin an chang a, tun dinhmunah helai hmunah hian ngawrh takin testing hrang hrang te an la kalpui zel mek a ni, an ti.

DC hi Additional DC Pu R. Lalremsanga leh SDC pahnih te bakah Department hrang hrang aiawh ten an tawiawm a ni.