No.1096/2021-2022

Kolasib dated 23rd June 2021: Vawiin chhun khan Dr.H.Lalthlangliana, Deputy Commissioner, Kolasib district chuan a pisaah Mizoram Journalist Association, Kolasib district-te kawmin hrileng dona kawnga hmalakna hrang hrang mipuite hriat tur pawimawh a sawipui a. Pu Vanlalfaka, SP, Dr.Lalhlimpuia, CMO, Pu Lallawmawma, Addl. DC, Pu Vanlalchhuanawma Chawngthu, SDO(S) leh Pu Hmingthanzuala, DIPRO-te an tel bawk a ni.

Dr.H.Lalthlangliana chuan inkharkhipna June ni 30, 2021 thleng a pawhseinaah hian inkhaihruaina khauh leh zawk a kalpui a nih theih nan ruahmanna siam a nih thu leh hmun hrang hranga duty-te pawh an mawhphurnate hrilhhriat thar an nih thu a sawi a. Kolasib district huam chhung ah ni 20 kal ta chhung a Covid-19 kai hmuhchhuah thar zat atanga chhutin nitin mi 17 vel kai thar ang vel a nih thu a tarlang.

Kolasib district chhung a hri darh zel tur ven nan sawrkar hnathawk atanga Executive Duty on Covid-19 team 24 ruat an ni a, anni hian khawchhung hmun 12 ah duty-na hmun neiin an bial chhung a lirthei leh mipui tul lova teihawi awm tur an veng thin a ni. Inkaidarhna thenkhat chu ngun zawk a thlir hian nitin mamawh phur lirthei khalhtute khaw chhung a an din thin vang nia a lan thu Deputy Commissioner chuan a sawi a, hetiang a thlen tawh loh nan khaw daiah inthiarna hmun leh tui te ruahmanin nitin mamawh phur lirthei chawlhna tur hmun engemawh zah siam a nih thu a sawi bawk a ni.

Thenawm khawveng inlen pawh lo tur a inzirtir tam a tul thu Dr.H.Lalthlangliana chuan a sawi a, UEFA EURO 2020 inkhel kalpui lai a nih angin thian hova en kher tum lovin mahni in lam theuh a en hram hram thin turin MJA, Kolasib District kaltlang hian Kolasib mipuite a ngen bawk a ni.

Mizoram sawrkar chuan Jordan Home, Sethaw, tun a Kolasib district-a Covid Care Centre atan a hman mek chu Covid-19 hri kai zinga ruihhlo ngaite enkawlna turin a ruahman a. Tun ah hian mi 178 awm mekin Sawrkar ruahmanna anga Mizoram chhunga hri kai zing a ruihhlo ngaite enkawlna bik tur a kalpui thuai tum a nih thu Kolasib DC hian a sawi bawk a ni.

Random Test kalpui chungchanga zawhna chhangin Kolasib DC chuan Random test hi a tul apiang a kalpui thin a nih thu a sawi a. Lirthei khalhtute dinhmun hriatchian nan kum hmasa lam khan Vairengteah random test kalpui a nih thu te, Kolasib hmun hrang hrang atanga District Hospital-a in entir tur te chu endik vek an nih bakah a duh apiang tan sample testing Centre-ah te in-Test tir theih reng a nih thu a sawi a. Heng test result atang hian khaw chhungah mipuite khauh zawk a inkhuahkhirna kalpui a tul thu sawiin DC chuan VLTF leh Executive Duty-te pawh koh khawm an nih tawh thu a sawi bawk a ni.